Germaniyalıq «Deutsche Bahn» kompaniyası. Foto: http://mygermany.live

Germaniyalıq «Deutsche Bahn» kompaniyası Qazaqstan äleuetine, ekonomikası men damu barısına bağa berdi.

Germaniyanıñ bastı temirjol tasımaldauşı kompaniyası sanalatın «Doyçe ban» basşılığı «Bir beldeu, bir jol» jobasındağı Qazaqstannıñ deñgeyine bağa berdi. Atalğan kompaniyanıñ Euraziyada biznes damıtu boyınşa ağa vice-prezidenti Uve Loyşnerdiñ pikirinşe, Qazaqstanda jük tasımalı qarqındı damıp, jaña temirjol habtarı men teñiz aylaqtarı salınıp jatır. Äsirese, Qorğas qwrğaq aylağı el ekonomikasına eleuli jetistik alıp kelui tiis.

Qazaqstan men Germaniya arasındağı ıntımaqtastıq baylanısqa toqtalıp ötken Uve Loyşner: «Biıl Qıtay men Germaniya arasında Jaña Jibek Jolımen 100 mıñnan asa konteyner jiberu közdelip otır. Sol sebepten bwl biz üşin mañızdı joba, al Qazaqstan negizgi seriktesimiz. Elderiñizdiñ zor äleueti bar jäne onı sätti jüzege asıruda. Osınıñ ayqın däleli Qorğas. Temirjol baylanısın jaqsartuımız kerek, aldağı jıldarı jük jetkizu merzimin 14 künnen 10 künge deyin qısqartıp, tasımal qwnın arzandatuğa tırısamız. Blokçeyn sekildi jaña tehnologiyalardı engizu alğa basuımızğa kömek beredi», – dep mälimdedi.

Ayta keteyik, Germaniya Qazaqstannıñ eñ iri üş sauda äriptesiniñ qatarına kiredi. 2017 jılı şildede Qazaqstan men Germaniya iskerlik keñesiniñ otırısında qwnı 872 mln euroğa bağalanatın 21 kelisimge qol qoyıldı. Al biıl 25 naurızda Germaniya Qarulı Küşteriniñ äskeri qimıldardı model'deu jäne äskeri medicina salasında cifrlıq monitoring jüyesin paydalanudı üyrenu maqsatında arnayı jasaq bölimşeleri arasında täjiribe almasu turalı kelisimderge qol qoyıldı.

"The Qazaq Times"