گەرمانيالىق «Deutsche Bahn» كومپانياسى. فوتو: http://mygermany.live

گەرمانيالىق «Deutsche Bahn» كومپانياسى قازاقستان الەۋەتىنە، ەكونوميكاسى مەن دامۋ بارىسىنا باعا بەردى.

گەرمانيانىڭ باستى تەمىرجول تاسىمالداۋشى كومپانياسى سانالاتىن «دويچە بان» باسشىلىعى «ءبىر بەلدەۋ، ءبىر جول» جوباسىنداعى قازاقستاننىڭ دەڭگەيىنە باعا بەردى. اتالعان كومپانيانىڭ ەۋرازيادا بيزنەس دامىتۋ بويىنشا اعا ۆيتسە-پرەزيدەنتى ۋۆە لويشنەردىڭ پىكىرىنشە، قازاقستاندا جۇك تاسىمالى قارقىندى دامىپ، جاڭا تەمىرجول حابتارى مەن تەڭىز ايلاقتارى سالىنىپ جاتىر. اسىرەسە، قورعاس قۇرعاق ايلاعى ەل ەكونوميكاسىنا ەلەۋلى جەتىستىك الىپ كەلۋى ءتيىس.

قازاقستان مەن گەرمانيا اراسىنداعى ىنتىماقتاستىق بايلانىسقا توقتالىپ وتكەن ۋۆە لويشنەر: «بيىل قىتاي مەن گەرمانيا اراسىندا جاڭا جىبەك جولىمەن 100 مىڭنان اسا كونتەينەر جىبەرۋ كوزدەلىپ وتىر. سول سەبەپتەن بۇل ءبىز ءۇشىن ماڭىزدى جوبا، ال قازاقستان نەگىزگى سەرىكتەسىمىز. ەلدەرىڭىزدىڭ زور الەۋەتى بار جانە ونى ءساتتى جۇزەگە اسىرۋدا. وسىنىڭ ايقىن دالەلى قورعاس. تەمىرجول بايلانىسىن جاقسارتۋىمىز كەرەك، الداعى جىلدارى جۇك جەتكىزۋ مەرزىمىن 14 كۇننەن 10 كۇنگە دەيىن قىسقارتىپ، تاسىمال قۇنىن ارزانداتۋعا تىرىسامىز. بلوكچەين سەكىلدى جاڭا تەحنولوگيالاردى ەنگىزۋ العا باسۋىمىزعا كومەك بەرەدى»، – دەپ مالىمدەدى.

ايتا كەتەيىك، گەرمانيا قازاقستاننىڭ ەڭ ءىرى ءۇش ساۋدا ارىپتەسىنىڭ قاتارىنا كىرەدى. 2017 جىلى شىلدەدە قازاقستان مەن گەرمانيا ىسكەرلىك كەڭەسىنىڭ وتىرىسىندا قۇنى 872 ملن ەۋروعا باعالاناتىن 21 كەلىسىمگە قول قويىلدى. ال بيىل 25 ناۋرىزدا گەرمانيا قارۋلى كۇشتەرىنىڭ اسكەري قيمىلداردى مودەلدەۋ جانە اسكەري مەديتسينا سالاسىندا تسيفرلىق مونيتورينگ جۇيەسىن پايدالانۋدى ۇيرەنۋ ماقساتىندا ارنايى جاساق بولىمشەلەرى اراسىندا تاجىريبە الماسۋ تۋرالى كەلىسىمدەرگە قول قويىلدى.

"The Qazaq Times"