Qıtay basısı hanımımen Franciyağa saparlay bardı. Foto: VOA.

Jeksenbi küni Franciyağa resmi saparmen barğan Qıtay basşısı Şi Jinpiñ Franciya prezidenti Emmanuel' Makronmen keşki asta birge boldı. Qıtay basşısınıñ Franciya saparı kezinde sol eldegi wyğır men tibet wltınıñ birqatar ökilderi narazılıq akciyasın ötkizdi.

Qıtay basşısı Italiya men Monako saparınan keyin 24 naurız küni Franciyanıñ Jerorta teñizi jağalauındağı Bloue attı şağın kurorttıq qalaşığına kelip, Franciya prezidentimen keşki as üstinde kezdesu ötkizdi.

Keşki astan keyingi seruen. Foto: VOA

Makron öziniñ «Tvitter» paraqşasında kezdesu turalı mälimdedi jäne Qıtay basşısı men onıñ hanımınıñ Franciyağa saparlay kelgenine quanıştı ekenin bildirdi. Sonday-aq, bwl sapar eki el arasındağı baylanıstı nığaytıp, EO jäne Franciyanıñ Qıtaymen bolğan strategiyalıq äriptestik jäne älem aldındağı köpjaqtı qatınasın damıtadı dep bağalağan.

Qalıptan tıs küşeytilgen qauipsizdik

Qıtay basşısınıñ Franciya saparı kezinde Jerorta teñizi jağasındağı atalğan qalanıñ qauipsizdik baqılauı küşeytildi. Francuz policiyaları teñiz ben jağalaudı tınbay şarlap twrğanı aqparat qwralarınıñ nazarın köbirek audardı.

Bwğan deyin Monako da Şi Jinpiñniñ saparı kezinde qauipsizdik şaraların birneşe ese küşeytken edi. Qıtay basşısınıñ atalğan eldegi qısqa uaqıttıq saparı kezinde el keñistiginen wşatın barlıq wşaqtarğa jäne su jolındağı kemelerge tıyım saldı. El twrğındarı bwnı Monako tarihında öte sirek bolğan jayday dep bağalağan.

Parijdegi narazılıq             

Jeksenbi küni Qıtay basşısı Franciyanıñ Jerorta teñizi jağalauındağı qalasına resmi saparmen barıp jatqan twsta, ortalıq qala Parijdıñ Adam qwqıqtarı alañında mıñnan astam adam narazılıq şeruine şıqtı. Olar el biligin jäne älemdi Şınjañ men Tibetke qoldau körsetuge şaqırıp, Qıtay ükimetinen adam qwqıqtarın qorğaudı, Tibet dini kösemi Dalay Lamamen kelissöz jürgizudi talap etti.

Parijdegi tibet pen wyğır ökilderiniñ narazılığı. Foto: VOA.

Narazılıq akciyasına şıqqan tibet ökilderi Franciya men Tibettiñ tau arıstanı beynelegen tuın köterdi jäne «Tibet azattığı» attı kerme tular kötergen. Şeruge şıqqan wyğır wltınıñ ökilderi Franciya tuımen qatar Şığıs Türkistannıñ täuelsizdik qozğalısın beyneleytin kök tudı wstağan.

Al, francuz aqparat agenttigi AFP jeksenbi küni habarında, Qıtaydıñ Şınjañ jerinde adam qwqıqtarınıñ jappay bwzılıp jatqanı turalı habar tarattı. Alayda, Franciya prezidenti Makron kezdesude Qıtay basşısına adam qwqığı men Şınjañ mäselesi turalı aytqan, aytpağanı turalı mälimet joq.

Qıtay basşısınıñ Europa saparı bügin Franciya astanası Parijde jalğaspaq. Onda ol prezident Makronmen birneşe mañızdı kelisimderge qol qoymaq. Sonday-aq, seysenbi küni Parije Germaniya kancleri Angela Merkel' jäne Europa Komissiyasınıñ törğası YUnkermen kezdesudi josparlağan.

 

“The Qazaq Times”