Qıtay basşısınıñ tarihi ornın bekemdeytin jaña qarar qabıldandı. Foto; NDTV.com

Qıtay Kommunistik partiyası Ortalıq komitetiniñ 6-şı plenaralıq otırısında «tarihi qarar» qabıldandı. Bwl qarar QKP-nıñ qazirgi jetekşisi Şi Jinpiñniñ (Si Czin'pin) partiya tarihındağı orının belgilep, onıñ dara biligin tipti de bekemdey tüsti. QKP tarihında bwğan deyin tek eki ğana jetekşi osınday tarihi qarardı qabıldağan, birinşi –Mau Zıdoñ (Mao Czedun) 1945 jılı qabıldasa, ekinşisi – Den Syaopin 1981 jılı jasağan.

QKP-nıñ jaña qararı partiyanıñ 100 jıldıq tarihın, partiya jetekşileriniñ bağası jäne bolaşaqtağı belgilegen bağıttarı qamtıladı. Bolaşaqqa qoyğan maqsattarınıñ birinde «Qıtaydı 2049 jılğa barğanda tolıqtay damığan, bay da quattı elge aynaldıru» közdelgen. Qarardıñ Qıtaydıñ sayasi basqaru jüyesine de özgerister alıp kelui mümkin. Aytalıq, QKP-nıñ ekinşi tarihi qararı arqılı Den partiyadağı darabilikti boldırmauğa negiz qalağan edi. Onı odan keyingi Czyan, Hou sekildi partiya jetekşileri birneşe wrpaq bilik kezeñinde jalğastırıp keldi. Al, qazirgi jetekşiniñ tarihi orının joğarılatqan jaña qarar onıñ şeksiz biligin qamtamasız etip, Qıtayda jekege tabındırudıñ jaña däuiri qalıptasuı mümkin.

Osılayşa Qıtaydıñ qazirgi basşısı öziniñ dara jäne şeksiz bilik jürgizuine soñğı bir ğana sayasi qadam qaldı. Ol bolsa keler jılı naruzır ayında ötetin jalpı wlttıq kongreste Şi Jinpiñdi üşinşi ökilettilik kezeñine saylau. Basım köp sarapşılar Şi bwl mañızdı qadamdı op-oñay jasay aladı jäne onı öz degenindey jüzege asıradı dep sanaydı. Sebebi, 2018 jılı özgertilgen partiya jarğısı men kezekti jaña «Tarihi qarar» onıñ bilik ökilettiligin kedergisiz jalğastıruğa jol aşıp qoyğan.

Bwnday bir adamnıñ qolına toptalğan bilik Qıtaydıñ soñğı 40 jıldağı basşılarında bolmağan. Qıtay reformatorı Den bilikti ortalıqtandırudı barınşa tejeytin jarğılardı tüzip şıqqanımen, Qıtaydıñ ekonomikalıq quatı artıp, älemdegi iri derjavağa aynalğan twsta bilikke kelgen Şi bwl qwqıqtıq kedergilerden op-oñay ötti. Endi Şi jaña qarar arqılı partiyanıñ ğana emes, Qıtay tarihındağı «wlı köşbasşı» retinde köringisi keledi.

Qazir Qıtaydıñ basqaru tüzimindegi bolsın, partiya biligi nemese biliktiñ narıqqa baqılauın küşeytui sekildi köptegen özgerister onıñ töñiregindegi elderdi ğana emes, älemniñ nazarın audarmay qoymaydı. Sebebi, el işinde eşqanday oppoziciyası joq jäne sayasi, äskeri biligi bir adamnıñ qolına tolıqtay şoğırlana tüsken Qıtaydıñ älemge jasaytın ıqpalın boljau qiınğa tüspek.

The Qazaq Times