AQŞ pen Qıtay basşıları keler aptada onlayn dialog ötkizui mümkin.

«Qatañ bäsekelestik qarım-qatınastağı» AQŞ pen Qıtay basşıları kelesi aptada beyne kezdesu ötkizedi dep kütilude. Onlayn sammit turalı Aq üydiñ resmi mälimdemesinde derjevalar arasındağı «qatañ bäsekelestik qatınastı» «jauapkerşilikpen birjaqtı etu» üşin atalğan sammittiñ asa mañızdı ekenin atap ötken.

AQŞ prezidenti Jou Bayden men Qıtay basşısı Şi Jinpiñ (Si Czin'pin) ortasındağı onlayn jüzdesu turalı eki el resmi mälimdeme jasağan joq. Tek osıdan bwrın onlayn sammit turalı  Beyjiñ tarabı «qayşılıqtardı dwrıs basqaru» üşin Uaşingtonmen jwmıs isteuge dayın ekenin aytqan bolatın.

«Reyter» men Bloomberg özderiniñ eñ senimdi degen derekközderine silteme jasay otırıp, taraptar mümkindiginşe tezirek dialog ötkizuge tırısıp jatqanın, degenmen onlayn kezdesudiñ naqtı uaqıtı äli twraqtanbağanın aytadı.

Eki eldiñ basşılarınıñ onlayn sammitin ötkizu üşin Beyjiñ men Uaşingtonnıñ birneşe joğarı lauazımdıları bwğan deyin de onlayn söylesulerdi ötkizgen. Biraq, onıñ bäri taraptar ortasındağı kürdeli qayşılıqtardı şeşip kete almadı.

Soñğı aylarda Tayuan jäne Şıñjañ mäseleleri boyınşa Uaşingon men Beyjiñ arasındağı qayşılıqtı pikirler tipti de tereñdey tüsti. Qıtaydıñ Tayuanğa (Tayvan'ğa) äskeri qısımın jalğastıra berui, yadrolıq arsenalın jıldam keñeytui jäne giper dıbıstıq zımırandardı sınauı köptegen sarapşılardı eki alpauıt derjava arasındağı apattı qaqtığısqa äkelui mümkin dep alañdata bastağanı mälim.

Ötken aptada AQŞ prezidenti Şotlandiyadağı klimat sammitine qatısqan kezde jurnalisterdiñ swrağına jauap berip, AQŞ-Qıtay arasında qarulı qaqtığısqa bastaytın pälendey ülken sebep joq ekenin, biraq kütpegen jerden qaqtığıs bolıp ketuinen alañdaytının aytqan bolatın.

Bayden prezident bolğannan beri Qıtay besşısı Şi Jinpiñmen resmi kezdesu ötkizgen joq. Onlayn kezdesude bolğan emes, tek birneşe ret telefon arqılı söyleskeni bar. Bayden Glazgodağı sammit kezinde osı söylesuler turalı aytıp: «Men bwl bäsekelestiktiñ janjalğa aynaluına negiz joq ekenin köp ret ayttım», – degen.

AQŞ pen Qıtay qazirgi küyde tikeley qarulı qaqtığıstan barınşa saqtanatını anıq. Degenmen, şielenister küşeygen sayın keybir sezimtal nüktelerdegi (aytalıq, Oñtüstik Qıtay teñizi, Tayuan bwğazı sekildi) kezdeysoq qaqtığıstardıñ qauipi jaqındap keledi. Beyjiñ men Uaşington arasında eñ joğarı basşılar ortasında osı qaqtığıstardıñ aldın alu üşin jäne ortadağı kereğarlıqtı talqılau üşin qalayda dialog jürgizetin kezine kelip qaldı. Taraptardıñ dialog ötkizuge barınşa asıqqanına qaray otırıp eki el arasındağı şielenistiñ tipti de qauipke qaray bet alğanın bağamdauğa da boladı.

The Qazaq Times