AQŞ Qazaqstan biligindegi auıs-tüyiske qatıstı pikir bildirdi

AQŞ Memlekettik departamenti jäne Kongres ökilderi Qazaqstan biligindegi auıs-tüyiske qatıstı pikir bildirdi.

Qwrama Ştat Memlekettik departamentiniñ resmi ökiliniñ orınbasarı Robert Palladino Qazaqstandı 30 jılğa juıq basqarğan Nwrswltan Nazarbaevtıñ 19 naurızda öz erkimen otstavkağa ketuine qatıstı mälimdeme jasadı. Memlekettik departament ökiliniñ aytuınşa, AQŞ-tıñ Qazaqstanmen qarım-qatınası aymaqtıq qauipsizdikti qwrmetteudiñ ortaq ideyalarına negizdelgen. Palladino mälimdemesinde: «Qazaqstan üşin osı tarihi sätte biz Nazarbaevtıñ bügingi zamanaui, egemen Qazaqstannıñ qalıptasuına qosqan ülesin jäne öñirlik, jahandıq deñgeyde sayasi biliktiligin qwrmetteymiz. Sonday-aq, yadrolıq qarudı taratpau, denuklearizaciyaqa qatıstı nätijeli jwmısın, Qazaqstanda beybitşilik pen güldenudi qamtamasız etu isine qosqan ülesin atap ötkimiz keledi», – dedi. Mälimdemede aytılğanday, AQŞ tarapı Qazaqstanmen Keñeytilgen strategiyalıq äriptestikti tereñdetu jäne ekonomikalıq damu, sauda jäne investiciyalar jäne öñirlik jäne jahandıq qauipsizdikti qamtamasız etu salasındağı birlesken jwmıstı jalğastıruğa nietti.

Qazaqstan işki sayasatındağı özgeristerge qatıstı AQŞ Kongresiniñ zertteuler jürgizu boyınşa qızmetkeri Uill Meki Qazaqstandı bilik tranziti jağdayında ne kütip twrğanı jaylı taldau jasağan. «The National Interest» basılımında jarıq körgen taldauda Qazaqstandı sayasi köşbasşını auıstıru kezinde ne kütip twrğandığı aytılğan.

2016 jılı Özbekstannıñ «avtoritarlıq prezidenti» Islam Kärimov qaytıs bolıp, bilik eldiñ prem'er-ministri Şavkat Mirzieevke auısqannan keyingi jağday bärimizge belgili. Jalpı sayasattağı osınday twraqsız jayttardı eskere kele, N.Nazarbaev 2017 jılı naurızda Konstituciyağa engizilgen birneşe tüzetulerdi maqwldadı. 2018 jıldıñ şildesinde Qazaqstan parlamenti Nazarbaevtıñ «tarihi missiyasına oray ömir boyı» eldiñ Qauipsizdik keñesin basqaruğa qwqıq beretin zañ jobasın qabıldadı. Bwl zañ jobası sonday-aq Keñesti konsul'tativtik organnan konstituciyalıq organğa aynaldırıp, onıñ ökilettigin keñeytkendigine toqtalğan Uill Meki öz maqalasında: «Elitalar arasındağı bilikke küres qazirgi basşı ketken jağdayda Qazaqstan twraqtılığı üşin eñ ülken qaterlerdiñ biri boluı mümkin. Al bwl jayttıñ sayasi jağdaydağı salmağı auır. Sol sebepten, Qazaqstandağı kez kelgen twraqsızdıq Uaşingtondı alañdatadı», – deydi.

Ayta keter bolsak, 19 naurızda jergilikti uaqıt boyınşa sağat 19:00-de Qazaqstannıñ twñğış prezidenti Nwrswltan Nazarbaev otstavkağa ketetindigin jariya etti. 20 naurızda QR Parlamenti palatalarınıñ birlesken otırısında QR prezidenti lauazımına tağayındalğan Qasım-Jomart Toqaev ant qabıldap, Astananıñ atauın «Nwrswltan» dep ataudı wsınğan. Mwnımen qosa, Toqaev respublikadağı qalalardıñ ortalıq köşeleriniñ atauın da Nwrswltan Nazarbaevtıñ atına berudi wsındı.

"The Qazaq Times"