Foto: https://bbci.co.uk

Euroodaq diplomattarı ötken jılı qaraşada Kerş bwğazında bolğan oqiğağa baylanıstı Reseydiñ birneşe azamatına sankciya engizu turalı qwjattı maqwldadı.

Osığan deyin Europalıq Odaq elderiniñ Reseyge qarsı sankciya engizu mäselesin talqılağanı jaylı jağğan bolatınbız. Reuters agenttiginiñ habarlauınşa, sankciyalıq tizimge Qırımda jäne Sevastopolda FSB Şekara qızmetiniñ basşısı Sergey Stankeviç, onıñ orınbasarı Andrey Şein, «Don» küzet kemesiniñ kapitanı Aleksey Salyaev, «Izumrud» kemesiniñ kapitanı Andrey Şipicin jäne «Suzdalec» teñiz kemesiniñ kapitanı Sergey Şerbakov engizilgen.

Bwğan deyin Mäskeu men Kiev teketiresine qatıstı BWW Qauipsizdik keñesiniñ otırısında AQŞ-tıñ twraqtı ökili Nikki Heyli Reseydiñ kezekti agressiyalıq äreketin «qauipti eskalaciya jäne halıqaralıq qwqıqtıñ bwzıluı» dep sınğa alğan. Al memlekettik hatşı Mayk Pompeo: «AQŞ Reseydiñ agressivti äreketterin ayıptaydı. Ukrainağa kemelerdi qaytarıp, wstalğan ekipaj müşelerin bosatudı, Ukrainanıñ egemendigi men onıñ aumaqtıq twtastığın qwrmetteudi Reseyden talap etemiz», – dep mälimdedi.

Eske sala keteyik, 25 qaraşada Resey arnayı jasağı Azov teñizinde Ukraina äskeri teñiz küşterine tiesili üş birdey kemege şabuıl jasap, basıp alğan bolatın. Osıdan keyin Ukraina qauipsizdik keñesiniñ kezekten tıs otırısı ötip, el prezidenti Petr Poroşenko soğıs jağdayın engizgen. Eki el arasındağı teketires NATO men EO elderin jäne AQŞ-tı bey-jay qaldırğan joq. NATO Reseyden Ukrainanıñ aumaqtıq twtastığına qwrmetpen qaraudı talap etse, Uaşington Mäskeudi «agressiyalıq bağıttağı memleket» dep ayıptadı.

"The Qazaq Times"