ەو رەسەي ازاماتتارىنا سانكتسيا ەنگىزدى

ەۋرووداق ديپلوماتتارى وتكەن جىلى قاراشادا كەرش بۇعازىندا بولعان وقيعاعا بايلانىستى رەسەيدىڭ بىرنەشە ازاماتىنا سانكتسيا ەنگىزۋ تۋرالى قۇجاتتى ماقۇلدادى.

وسىعان دەيىن ەۋروپالىق وداق ەلدەرىنىڭ رەسەيگە قارسى سانكتسيا ەنگىزۋ ماسەلەسىن تالقىلاعانى جايلى جاععان بولاتىنبىز. Reuters اگەنتتىگىنىڭ حابارلاۋىنشا، سانكتسيالىق تىزىمگە قىرىمدا جانە سەۆاستوپولدا فسب شەكارا قىزمەتىنىڭ باسشىسى سەرگەي ستانكەۆيچ، ونىڭ ورىنباسارى اندرەي شەين، «دون» كۇزەت كەمەسىنىڭ كاپيتانى الەكسەي سالياەۆ، «يزۋمرۋد» كەمەسىنىڭ كاپيتانى اندرەي شيپيتسين جانە «سۋزدالەتس» تەڭىز كەمەسىنىڭ كاپيتانى سەرگەي ششەرباكوۆ ەنگىزىلگەن.

بۇعان دەيىن ماسكەۋ مەن كيەۆ تەكەتىرەسىنە قاتىستى بۇۇ قاۋىپسىزدىك كەڭەسىنىڭ وتىرىسىندا اقش-تىڭ تۇراقتى وكىلى نيككي حەيلي رەسەيدىڭ كەزەكتى اگرەسسيالىق ارەكەتىن «قاۋىپتى ەسكالاتسيا جانە حالىقارالىق قۇقىقتىڭ بۇزىلۋى» دەپ سىنعا العان. ال مەملەكەتتىك حاتشى مايك پومپەو: «اقش رەسەيدىڭ اگرەسسيۆتى ارەكەتتەرىن ايىپتايدى. ۋكرايناعا كەمەلەردى قايتارىپ، ۇستالعان ەكيپاج مۇشەلەرىن بوساتۋدى، ۋكراينانىڭ ەگەمەندىگى مەن ونىڭ اۋماقتىق تۇتاستىعىن قۇرمەتتەۋدى رەسەيدەن تالاپ ەتەمىز»، – دەپ مالىمدەدى.

ەسكە سالا كەتەيىك، 25 قاراشادا رەسەي ارنايى جاساعى ازوۆ تەڭىزىندە ۋكراينا اسكەري تەڭىز كۇشتەرىنە تيەسىلى ءۇش بىردەي كەمەگە شابۋىل جاساپ، باسىپ العان بولاتىن. وسىدان كەيىن ۋكراينا قاۋىپسىزدىك كەڭەسىنىڭ كەزەكتەن تىس وتىرىسى ءوتىپ، ەل پرەزيدەنتى پەتر پوروشەنكو سوعىس جاعدايىن ەنگىزگەن. ەكى ەل اراسىنداعى تەكەتىرەس ناتو مەن ەو ەلدەرىن جانە اقش-تى بەي-جاي قالدىرعان جوق. ناتو رەسەيدەن ۋكراينانىڭ اۋماقتىق تۇتاستىعىنا قۇرمەتپەن قاراۋدى تالاپ ەتسە، ۋاشينگتون ماسكەۋدى «اگرەسسيالىق باعىتتاعى مەملەكەت» دەپ ايىپتادى.

"The Qazaq Times"