Ükimet otstavkağa ketui tiis. Prezident Nwrswltan Nazarbaev osınday mälimdeme jasadı. 

Mälimdemede Nazarbaev: «Ötken jıldardağı äleumettik-ekonomikalıq jağday twraqtı boldı. Bwl, ärine, sözsiz sätti jağday. Biraq bwl qazirgi uaqıt üşin jetkiliksiz. Meniñ bastamammen iske asqan «Üşinşi jañğıru» men «Wlt josparı – 100 naqtı qadam» jobası qwrılımdıq reformalardı jedel jürgizuge bağıttalğan bolatın. Bes institucionaldıq reformanı tolıq iske asıru ekonomikadağı memlekettik sektordıñ ülesin tömendetui, bankterdi «tazartuı», sottar men qwqıq qorğau jüyesine degen senimdi arttıruı tiis edi. Biraq, köptegen zañdardıñ qabıldanuına qaramastan, ekonomikanıñ är bağıttarı boyınşa oñ özgeristerge qol jetkizilmegen. Ükimet Wlttıq bankpen birlesip ekonomikanıñ sapalı ösui üşin naqtı ıntalandıru jwmıstarı men qwraldardı tolıq kölemde qwra almadı. Köptegen mañızdı bağıttar boyınşa naqtı nätijeler joq. Äsirese auıldıq jerlerde önimdi jwmıs orındarı jetkiliksiz.

Eki jıl bwrın biz konstituciyalıq reforma jürgizdik. Barlıq qajetti memlekettik bağdarlamalar qabıldandı, onıñ işinde industriyalıq, äleumettik infraqwrılımdı damıtu, densaulıq saqtau jäne bilim beru. Olardı jüzege asıru üşin qajetti resurstar bölindi. Alayda, jüyeli jwmıs äli de jasalmağan. Halıqtıñ äleumettik jağdayı tömen otbasılar arnayı kömekpen qamtılmağan. Bwl jağdayda, Ükimet otstavkağa ketui tiis dep esepteymin», – dedi.

Sonday-aq, mälimdemede «Nwr Otan» partiyasınıñ tayaudağı s'ezinde äleumettik qoldaudı küşeytu jäne adamdardıñ ömir süru sapasın arttıru boyınşa birqatar şaralar wsınılıp, oğan byudjetten jäne Wlttıq qordan qomaqtı qarajat bölinetini aytılğan. Qarajat az qamtılğan azamattardı äleumettik qoldau, twrğın üy jağdayın jaqsartu jäne öñirlerdi damıtu sayasatınıñ eleuli özgerui üşin bağıttalmaq.

"The Qazaq Times"