ۇكىمەت وتستاۆكاعا كەتۋى ءتيىس. پرەزيدەنت نۇرسۇلتان نازارباەۆ وسىنداي مالىمدەمە جاسادى. 

مالىمدەمەدە نازارباەۆ: «وتكەن جىلدارداعى الەۋمەتتىك-ەكونوميكالىق جاعداي تۇراقتى بولدى. بۇل، ارينە، ءسوزسىز ءساتتى جاعداي. بىراق بۇل قازىرگى ۋاقىت ءۇشىن جەتكىلىكسىز. مەنىڭ باستاماممەن ىسكە اسقان «ءۇشىنشى جاڭعىرۋ» مەن «ۇلت جوسپارى – 100 ناقتى قادام» جوباسى قۇرىلىمدىق رەفورمالاردى جەدەل جۇرگىزۋگە باعىتتالعان بولاتىن. بەس ينستيتۋتسيونالدىق رەفورمانى تولىق ىسكە اسىرۋ ەكونوميكاداعى مەملەكەتتىك سەكتوردىڭ ۇلەسىن تومەندەتۋى، بانكتەردى «تازارتۋى»، سوتتار مەن قۇقىق قورعاۋ جۇيەسىنە دەگەن سەنىمدى ارتتىرۋى ءتيىس ەدى. بىراق، كوپتەگەن زاڭداردىڭ قابىلدانۋىنا قاراماستان، ەكونوميكانىڭ ءار باعىتتارى بويىنشا وڭ وزگەرىستەرگە قول جەتكىزىلمەگەن. ۇكىمەت ۇلتتىق بانكپەن بىرلەسىپ ەكونوميكانىڭ ساپالى ءوسۋى ءۇشىن ناقتى ىنتالاندىرۋ جۇمىستارى مەن قۇرالداردى تولىق كولەمدە قۇرا المادى. كوپتەگەن ماڭىزدى باعىتتار بويىنشا ناقتى ناتيجەلەر جوق. اسىرەسە اۋىلدىق جەرلەردە ءونىمدى جۇمىس ورىندارى جەتكىلىكسىز.

ەكى جىل بۇرىن ءبىز كونستيتۋتسيالىق رەفورما جۇرگىزدىك. بارلىق قاجەتتى مەملەكەتتىك باعدارلامالار قابىلداندى، ونىڭ ىشىندە يندۋستريالىق، الەۋمەتتىك ينفراقۇرىلىمدى دامىتۋ، دەنساۋلىق ساقتاۋ جانە ءبىلىم بەرۋ. ولاردى جۇزەگە اسىرۋ ءۇشىن قاجەتتى رەسۋرستار ءبولىندى. الايدا، جۇيەلى جۇمىس ءالى دە جاسالماعان. حالىقتىڭ الەۋمەتتىك جاعدايى تومەن وتباسىلار ارنايى كومەكپەن قامتىلماعان. بۇل جاعدايدا، ۇكىمەت وتستاۆكاعا كەتۋى ءتيىس دەپ ەسەپتەيمىن»، – دەدى.

سونداي-اق، مالىمدەمەدە «نۇر وتان» پارتياسىنىڭ تاياۋداعى سەزىندە الەۋمەتتىك قولداۋدى كۇشەيتۋ جانە ادامداردىڭ ءومىر ءسۇرۋ ساپاسىن ارتتىرۋ بويىنشا بىرقاتار شارالار ۇسىنىلىپ، وعان بيۋدجەتتەن جانە ۇلتتىق قوردان قوماقتى قاراجات بولىنەتىنى ايتىلعان. قاراجات از قامتىلعان ازاماتتاردى الەۋمەتتىك قولداۋ، تۇرعىن ءۇي جاعدايىن جاقسارتۋ جانە وڭىرلەردى دامىتۋ ساياساتىنىڭ ەلەۋلى وزگەرۋى ءۇشىن باعىتتالماق.

"The Qazaq Times"