Foto: hydroponicshighway.com

Soltüstik Dakotadağı Dakota Access mwnay qwbırınıñ salınuına qarsılıq bildirgen narazı toptıñ köpşiligi bir jıl boyı twraqtağan lagerlerin tastap ketuge mäjbür boldı dep habarlaydı bbc.com .
Sebebi, AQŞ policiyası lagerlerden köşuge qarsı bolğan ereuilşilerdi twtqınğa alıp, küştep köşiru şaraların jürgizude.
AQŞ ükimetiniñ qabıldağan şeşimi boyınşa, kündizgi sağat 2-de lager qwrğan narazı top ökilderi tolıqtay federaldı jer telimin bosatuğa tiis bolğan.
Al AQŞ äskeriniñ öñirlik ekologiyanı qadağalap jäne özenderdiñ infraqwrılımın rettestirip otıratın injenerlik bölimşesiniñ habarlauınşa, uaqıttıñ tım qısqa berilui köktemdegi su tasqını qaterinen dep körsetip otır. BAQ ökilderiniñ aqparattarına säykes, lagerdiñ aumağındağı qoqıs pen aua rayınıñ qolaysızdığı da jwmıstıñ josparmen jürgiziluine kedergi keltirude.

Foto: hydroponicshighway.com

Narazı toptıñ köpşiligi bilik tärtibine moyınswnıp, beybit  türde  lagerlerdi bosattı.  Sonımen qatar, olar özindik räsimderin orındap: şatırlar men ağaş üylerdi örtep, 150-ge juıq adam qol wstasıp, barabandarın wrıp, ändete otırıp, qoştasu marşın orındadı dep habarlaydı  Associated Press  tilşileri.
Al lagerlerden ketuden bas tartıp, qalıp qoyğan ereuilşilerdi policiya belgilengen uaqıttan eki sağat ötkennen keyin twtqınğa aldı. Keyin onşaqtı ereuilşiniñ wstalğandığı belgili boldı.
Osı uaqıtqa deyin lagerde birneşe jüzdey adam twrıp kelgen. Eñ qarqındı narazılıq kezeñderiñde audanda ereuilşilerdiñ sanı birneşe mıñğa jetken. Narazılıq akciyasına qatısuşılar köbine jergilikti amerikandıqtar men belsendi top ökilderinen qwralğan. Olardıñ pikirinşe,  Stending-Rok audanımen şektesetin Dakota Access mwnay qwbırınıñ qwrılısı jergilikti sudıñ jäne ekologiyanıñ lastanuına alıp keledi.
Sonday-aq, jergilikti taypalar özderiniñ mädeni aymaqtarınıñ bolaşağına alañdaulı.
Ötken jıldıñ jeltoqsan ayında mwnay qwbırınıñ qwrılısı toqtatılğan bolatın. Al  qañtar ayınıñ soñında, Amerika Qwrama Ştattarınıñ  Prezidenti Donal'd Tramp qwbırdıñ qwrılısın qayta bastau turalı Jarlıqqa qol qoydı. Jergilikti twrğındar Tramptıñ jarlığına şağımdanıp, sotqa arız jazğanımen, biraq sot twrğındardıñ  şağımın qabıldamadı.

Aud:Gauhar Jaqıpbay

“The Qazaq Times”