ترامپ ۇكىمەتى سولتۇستىك داكوتاداعى ەرەۋىلشىلەردى كۇشپەن تاراتتى

سولتۇستىك داكوتاداعى Dakota Access مۇناي قۇبىرىنىڭ سالىنۋىنا قارسىلىق بىلدىرگەن نارازى توپتىڭ كوپشىلىگى ءبىر جىل بويى تۇراقتاعان لاگەرلەرىن تاستاپ كەتۋگە ءماجبۇر بولدى دەپ حابارلايدى bbc.com .
سەبەبى، اقش پوليتسياسى لاگەرلەردەن كوشۋگە قارسى بولعان ەرەۋىلشىلەردى تۇتقىنعا الىپ، كۇشتەپ كوشىرۋ شارالارىن جۇرگىزۋدە.
اقش ۇكىمەتىنىڭ قابىلداعان شەشىمى بويىنشا، كۇندىزگى ساعات 2-دە لاگەر قۇرعان نارازى توپ وكىلدەرى تولىقتاي فەدەرالدى جەر تەلىمىن بوساتۋعا ءتيىس بولعان.
ال اقش اسكەرىنىڭ وڭىرلىك ەكولوگيانى قاداعالاپ جانە وزەندەردىڭ ينفراقۇرىلىمىن رەتتەستىرىپ وتىراتىن ينجەنەرلىك بولىمشەسىنىڭ حابارلاۋىنشا، ۋاقىتتىڭ تىم قىسقا بەرىلۋى كوكتەمدەگى سۋ تاسقىنى قاتەرىنەن دەپ كورسەتىپ وتىر. باق وكىلدەرىنىڭ اقپاراتتارىنا سايكەس، لاگەردىڭ اۋماعىنداعى قوقىس پەن اۋا رايىنىڭ قولايسىزدىعى دا جۇمىستىڭ جوسپارمەن جۇرگىزىلۋىنە كەدەرگى كەلتىرۋدە.

فوتو: hydroponicshighway.com

نارازى توپتىڭ كوپشىلىگى بيلىك تارتىبىنە مويىنسۇنىپ، بەيبىت  تۇردە  لاگەرلەردى بوساتتى.  سونىمەن قاتار، ولار وزىندىك راسىمدەرىن ورىنداپ: شاتىرلار مەن اعاش ۇيلەردى ورتەپ، 150-گە جۋىق ادام قول ۇستاسىپ، باراباندارىن ۇرىپ، اندەتە وتىرىپ، قوشتاسۋ مارشىن ورىندادى دەپ حابارلايدى  Associated Press  تىلشىلەرى.
ال لاگەرلەردەن كەتۋدەن باس تارتىپ، قالىپ قويعان ەرەۋىلشىلەردى پوليتسيا بەلگىلەنگەن ۋاقىتتان ەكى ساعات وتكەننەن كەيىن تۇتقىنعا الدى. كەيىن ونشاقتى ەرەۋىلشىنىڭ ۇستالعاندىعى بەلگىلى بولدى.
وسى ۋاقىتقا دەيىن لاگەردە بىرنەشە جۇزدەي ادام تۇرىپ كەلگەن. ەڭ قارقىندى نارازىلىق كەزەڭدەرىڭدە اۋداندا ەرەۋىلشىلەردىڭ سانى بىرنەشە مىڭعا جەتكەن. نارازىلىق اكتسياسىنا قاتىسۋشىلار كوبىنە جەرگىلىكتى امەريكاندىقتار مەن بەلسەندى توپ وكىلدەرىنەن قۇرالعان. ولاردىڭ پىكىرىنشە،  ستەندينگ-روك اۋدانىمەن شەكتەسەتىن Dakota Access مۇناي قۇبىرىنىڭ قۇرىلىسى جەرگىلىكتى سۋدىڭ جانە ەكولوگيانىڭ لاستانۋىنا الىپ كەلەدى.
سونداي-اق، جەرگىلىكتى تايپالار وزدەرىنىڭ مادەني ايماقتارىنىڭ بولاشاعىنا الاڭداۋلى.
وتكەن جىلدىڭ جەلتوقسان ايىندا مۇناي قۇبىرىنىڭ قۇرىلىسى توقتاتىلعان بولاتىن. ال  قاڭتار ايىنىڭ سوڭىندا، امەريكا قۇراما شتاتتارىنىڭ  پرەزيدەنتى دونالد ترامپ قۇبىردىڭ قۇرىلىسىن قايتا باستاۋ تۋرالى جارلىققا قول قويدى. جەرگىلىكتى تۇرعىندار ترامپتىڭ جارلىعىنا شاعىمدانىپ، سوتقا ارىز جازعانىمەن، بىراق سوت تۇرعىنداردىڭ  شاعىمىن قابىلدامادى.

اۋد:گاۋھار جاقىپباي

“The Qazaq Times”