Madina Äbilqasımova. foto: kursiv.kz

Sırqatınan ayıqqan Eñbek jäne halıqtı äleumettik qorğau ministri Madina Äbilqasımova Astanadağı qayğılı jağdayğa baylanıstı mälimdeme jasadı. 

4 aqpan küni Astanada bolğan qayğılı jağday qalıñ qazaqtı qara jamıldırğandığı jasırın emes. Bes birdey büldirşinniñ qazasına dürlikken jwrtşılıq jappay biliktegilerdiñ salğırt qızmetine şağımdarın aytıp, tipti otstavkağa ketuin de talap etti. Sonıñ eñ birinşisi Eñbek jäne halıqtı äleumettik qorğau ministri Madina Äbilqasımova bolatın.

Jwrttıñ bwlay dürligip Äbilqasımovanıñ otstavkağa ketui turalı talap qoyuınıñ özindik sebepteri de bar. Äuelde köpbalalı otbasılarğa memleketten bölinetin 16000 teñgeni köpsingeni, qayğılı qazağa ortaqtasıp köñil aytpağandığı jäne sol mezette sırqattana qalğanı, tanımal Forbes jurnalınıñ mwqabasınan jılt etip şığuı köpşiliktiñ aşuına tidi.

Sol mezette daurıqqan twrğındar Madina Äbilqasımovanıñ qanday  da bir mälimdemesin tosqandığı da jasırın emes. Alayda, bäri tınıştalğanın kütkendey äser qaldırğan ministr tıñ mälimdemesinen sayasi arenağa qayta şıqtı.

"Bizdiñ ministrlik sınğa wşıradı, sebebi biz köptegen qiın mäselemen aynalısamız. Osı sınnıñ barlığın eskere otırıp, biz qajetti şaralardı qabıldauğa tırısamız", - dep  ükimet otırısınan keyin Madina Äbilqasımova özderiniñ sınğa wşırağandığın endi sezingendey pikirin jetkizdi.

Sonımen qatar,  barlıq ortalıq jäne jergilikti memlekettik organdarğa köpbalalı otbasılardı qoldau boyınşa jwmıstar jürgizuge tapsırma berilgendigin de atap ötti.

"Jergilikti jerlerde jedel ştabtar qwrıldı, olar köpbalalı otbasılardan kelip tüsetin aqparat jinap, bağa berip, wsınıstar jinaydı. Osı wsınıstardıñ barlığı jwmıs tobında qaralatın boladı. Jwmıs tobınıñ birinşi otırısı ötken aptada ötkizildi. Barlıq ortalıq, jergilikti memlekettik organdarğa naqtı tapsırmalar berildi. Jwmıs tobınıñ kezekti otırısı osı beysenbige josparlanıp otır, qoğam ökilderi men mamandardı şaqıru josparlanğan. Äleumettik qoldaudı jaqsartu boyınşa keşendi şeşimder wsınıladı dep oylaymın", - dedi Madina Äbilqasımova.

Köpbalalı otbasılarğa beriletin 16000 teñgeniñ az ekendigin endi ğana sezingen Eñbek jäne halıqtı äleumettik qorğau ministri arı qaray basqaşa jwmıs jasaytındığın körsetkendey sıñay tanıttı.

Qazirgi tañda bwl oqiğa teñ, Eñbek jäne halıqtı äleumettik qorğau ministrligin ğana emes, bükil bilikti dür silkindirdi. Ükimet basşısı Baqıtjan Sağıntaev osı oqiğağa baylanıstı Tötenşe jağdaylar kommiteti basşısınıñ orınbasarı Barat Twzaqbaevtı orınınan alıp, İİD basşısı orınbasarı YUriy Il'in men TJK basşısı Vladimir Bekkerge qatañ sögis jariyaladı.

Büginde köpbalalı otbasılarğa türli äleumettik jağday jasaluı turalı talaptar biliktiñ talqısında twr. Onıñ qalay şeşiletindigi aldağı uaqıtta belgili bolmaq.

“The Qazaq Times”