مينيستر ابىلقاسىموۆا الەۋمەتتىك قولداۋدى جاقسارتۋ شارالارىن قابىلداماق

سىرقاتىنان ايىققان ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆا استاناداعى قايعىلى جاعدايعا بايلانىستى مالىمدەمە جاسادى. 

4 اقپان كۇنى استانادا بولعان قايعىلى جاعداي قالىڭ قازاقتى قارا جامىلدىرعاندىعى جاسىرىن ەمەس. بەس بىردەي ءبۇلدىرشىننىڭ قازاسىنا دۇرلىككەن جۇرتشىلىق جاپپاي بيلىكتەگىلەردىڭ سالعىرت قىزمەتىنە شاعىمدارىن ايتىپ، ءتىپتى وتستاۆكاعا كەتۋىن دە تالاپ ەتتى. سونىڭ ەڭ ءبىرىنشىسى ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆا بولاتىن.

جۇرتتىڭ بۇلاي دۇرلىگىپ ابىلقاسىموۆانىڭ وتستاۆكاعا كەتۋى تۋرالى تالاپ قويۋىنىڭ وزىندىك سەبەپتەرى دە بار. اۋەلدە كوپبالالى وتباسىلارعا مەملەكەتتەن بولىنەتىن 16000 تەڭگەنى كوپسىنگەنى، قايعىلى قازاعا ورتاقتاسىپ كوڭىل ايتپاعاندىعى جانە سول مەزەتتە سىرقاتتانا قالعانى، تانىمال فوربەس جۋرنالىنىڭ مۇقاباسىنان جىلت ەتىپ شىعۋى كوپشىلىكتىڭ اشۋىنا ءتيدى.

سول مەزەتتە داۋرىققان تۇرعىندار مادينا ابىلقاسىموۆانىڭ قانداي  دا ءبىر مالىمدەمەسىن توسقاندىعى دا جاسىرىن ەمەس. الايدا، ءبارى تىنىشتالعانىن كۇتكەندەي اسەر قالدىرعان مينيستر تىڭ مالىمدەمەسىنەن ساياسي ارەناعا قايتا شىقتى.

ء"بىزدىڭ مينيسترلىك سىنعا ۇشىرادى، سەبەبى ءبىز كوپتەگەن قيىن ماسەلەمەن اينالىسامىز. وسى سىننىڭ بارلىعىن ەسكەرە وتىرىپ، ءبىز قاجەتتى شارالاردى قابىلداۋعا تىرىسامىز", - دەپ  ۇكىمەت وتىرىسىنان كەيىن مادينا ابىلقاسىموۆا وزدەرىنىڭ سىنعا ۇشىراعاندىعىن ەندى سەزىنگەندەي پىكىرىن جەتكىزدى.

سونىمەن قاتار،  بارلىق ورتالىق جانە جەرگىلىكتى مەملەكەتتىك ورگاندارعا كوپبالالى وتباسىلاردى قولداۋ بويىنشا جۇمىستار جۇرگىزۋگە تاپسىرما بەرىلگەندىگىن دە اتاپ ءوتتى.

"جەرگىلىكتى جەرلەردە جەدەل شتابتار قۇرىلدى، ولار كوپبالالى وتباسىلاردان كەلىپ تۇسەتىن اقپارات جيناپ، باعا بەرىپ، ۇسىنىستار جينايدى. وسى ۇسىنىستاردىڭ بارلىعى جۇمىس توبىندا قارالاتىن بولادى. جۇمىس توبىنىڭ ءبىرىنشى وتىرىسى وتكەن اپتادا وتكىزىلدى. بارلىق ورتالىق، جەرگىلىكتى مەملەكەتتىك ورگاندارعا ناقتى تاپسىرمالار بەرىلدى. جۇمىس توبىنىڭ كەزەكتى وتىرىسى وسى بەيسەنبىگە جوسپارلانىپ وتىر، قوعام وكىلدەرى مەن مامانداردى شاقىرۋ جوسپارلانعان. الەۋمەتتىك قولداۋدى جاقسارتۋ بويىنشا كەشەندى شەشىمدەر ۇسىنىلادى دەپ ويلايمىن", - دەدى مادينا ابىلقاسىموۆا.

كوپبالالى وتباسىلارعا بەرىلەتىن 16000 تەڭگەنىڭ از ەكەندىگىن ەندى عانا سەزىنگەن ەڭبەك جانە حالىقتى الەۋمەتتىك قورعاۋ ءمينيسترى ارى قاراي باسقاشا جۇمىس جاسايتىندىعىن كورسەتكەندەي سىڭاي تانىتتى.

قازىرگى تاڭدا بۇل وقيعا تەڭ، ەڭبەك جانە حالىقتى الەۋمەتتىك قورعاۋ مينيسترلىگىن عانا ەمەس، بۇكىل بيلىكتى ءدۇر سىلكىندىردى. ۇكىمەت باسشىسى باقىتجان ساعىنتاەۆ وسى وقيعاعا بايلانىستى توتەنشە جاعدايلار كومميتەتى باسشىسىنىڭ ورىنباسارى بارات تۇزاقباەۆتى ورىنىنان الىپ، ءىىد باسشىسى ورىنباسارى يۋري يلين مەن تجك باسشىسى ۆلاديمير بەككەرگە قاتاڭ سوگىس جاريالادى.

بۇگىندە كوپبالالى وتباسىلارعا ءتۇرلى الەۋمەتتىك جاعداي جاسالۋى تۋرالى تالاپتار بيلىكتىڭ تالقىسىندا تۇر. ونىڭ قالاي شەشىلەتىندىگى الداعى ۋاقىتتا بەلگىلى بولماق.

“The Qazaq Times”