AQŞ-tıñ Tayuandağı qauımdastığınıñ joğarı deñgeydegi kezdesui. Foto: VOA

AQŞ-tıñ Tayuandağı (Tavan') qauımdastığı (American Association of Taiwan/AIT) beysenbi küni mälimdeme jasap, Beyjiñ biligin mäjbürleu men qısımdı toqtatıp, Tayuanmen dialogtı qalpına keltiruge şaqırdı.

Qıtay basşısınıñ Tayuan turalı pikirine jauap retinde, AQŞ-tıñ Tayuandağı qauımdastığınıñ baspasöz hatşısı Amanda Mansour hanım: «Bwğazdıñ eki jağalauı wzaq merzimdi beybitşilik pen twraqtılıqqa müddeli. Kez-kelgen qayşılıqtardı şeşude eki jağalau twrğındarınıñ talap-tilekterine negizdelu kerek», – dedi.

Onıñ aytuınşa Qwrama Ştat tarabı älde qaşan Beyjiñge joğarı qısımdı toqtatıp, Tayuan ükimetimen baylanıstı qalpına keltiru talabın qoyğan. Tayuandağı AQŞ qauımdastığınıñ atalğan mälimdemesinen bwrın, Aq üydiñ Wlttıq qauipsizdik jönindegi Keñesiniñ ökili Garret Markuis Tvitter arqılı: «Qwrama Ştat Tayuan halqına qarata äskeri küş qoldanuğa tübegeyli qarsı. Taraptar arasındağı qayşılıqtı retteu beybit türde jürgiziluin qoldaydı. Tayuandıqtardıñ talap-tilegine qwrmet etiluin bastı nazarğa wstaymız», – dep mälimdegen.

Esteriñizge sala keteyik, Qıtay basşısı 2 qañtar küni Tayuan QHR-men birigui kerek ekenin, äri solay bolatının, bwl üşin äskeri küş qoldanudan da tayınbaytının aytqan.  Bwl Tayuan ükimeti men twrğındarı jağınan jäne älemniñ birqatar eliniñ narazılığın qozğadı.

 “The Qazaq Times”