تايۆانداعى اقش قاۋىمداستىعى قىتاي بيلىگىنە قىسمىن توقتاتۋدى ەسكەرتتى

اقش-تىڭ تايۋانداعى (تاۆان) قاۋىمداستىعى (American Association of Taiwan/AIT) بەيسەنبى كۇنى مالىمدەمە جاساپ، بەيجىڭ بيلىگىن ماجبۇرلەۋ مەن قىسىمدى توقتاتىپ، تايۋانمەن ديالوگتى قالپىنا كەلتىرۋگە شاقىردى.

قىتاي باسشىسىنىڭ تايۋان تۋرالى پىكىرىنە جاۋاپ رەتىندە، اقش-تىڭ تايۋانداعى قاۋىمداستىعىنىڭ ءباسپاسوز حاتشىسى اماندا مانسوۋر حانىم: «بۇعازدىڭ ەكى جاعالاۋى ۇزاق مەرزىمدى بەيبىتشىلىك پەن تۇراقتىلىققا مۇددەلى. كەز-كەلگەن قايشىلىقتاردى شەشۋدە ەكى جاعالاۋ تۇرعىندارىنىڭ تالاپ-تىلەكتەرىنە نەگىزدەلۋ كەرەك»، – دەدى.

ونىڭ ايتۋىنشا قۇراما شتات تارابى الدە قاشان بەيجىڭگە جوعارى قىسىمدى توقتاتىپ، تايۋان ۇكىمەتىمەن بايلانىستى قالپىنا كەلتىرۋ تالابىن قويعان. تايۋانداعى اقش قاۋىمداستىعىنىڭ اتالعان مالىمدەمەسىنەن بۇرىن، اق ءۇيدىڭ ۇلتتىق قاۋىپسىزدىك جونىندەگى كەڭەسىنىڭ وكىلى گاررەت ماركۋيس تۆيتتەر ارقىلى: «قۇراما شتات تايۋان حالقىنا قاراتا اسكەري كۇش قولدانۋعا تۇبەگەيلى قارسى. تاراپتار اراسىنداعى قايشىلىقتى رەتتەۋ بەيبىت تۇردە جۇرگىزىلۋىن قولدايدى. تايۋاندىقتاردىڭ تالاپ-تىلەگىنە قۇرمەت ەتىلۋىن باستى نازارعا ۇستايمىز»، – دەپ مالىمدەگەن.

ەستەرىڭىزگە سالا كەتەيىك، قىتاي باسشىسى 2 قاڭتار كۇنى تايۋان قحر-مەن بىرىگۋى كەرەك ەكەنىن، ءارى سولاي بولاتىنىن، بۇل ءۇشىن اسكەري كۇش قولدانۋدان دا تايىنبايتىنىن ايتقان.  بۇل تايۋان ۇكىمەتى مەن تۇرعىندارى جاعىنان جانە الەمنىڭ بىرقاتار ەلىنىڭ نارازىلىعىن قوزعادى.

 “The Qazaq Times”