"Elamanaty" birlestigi 6 türli wsınıstı ortağa saldı. Foto: QT,

Keşe, 10 qañtar, Almatıda elge kelgen qandastardıñ azamattıq alu jäne qwjattıq jwmıstarın jeñildetu mäselesi boyınşa «Elamanaty» qoğamdıq birlestiginiñ wyımdastıruımen «Törteu tügel bolsa» attı döñgelek üstel ötti.

Elge kelgen qandastardıñ qwjat tapsıruda jäne azamattıq aludağı qiınşılıqtarın taqırıp etken jinalısqa Qazaqstan halıq jazuşısı Qabdeş Jümädilov, tarih ğılımdarınıñ doktorı, professor Näbijan Mwhammedjan bastağan ziyalı qauım ökilderi men BAQ ökilderi qatıstı.

Şaranı wyımdastıruşı qoğamdıq birlestiktiñ törağası Toqtasın Rısbek birlestik atınan qandastardıñ qwjat räsimdeudegi kezdesetin naqtı qiınşılıqtarın jäne soğan qatıstı memlekettik mekemelerge 6 türli wsınısın qoydı. Sonımen qatar wsınıstarın döñgelek üstel talqısına saldı.

Jazuşı Qabdeş Jümädilov ükimettiñ bwl bağıttağı jwmısın sınğa aldı. Foto: QT,

Almatı qalalıq Eñbek inspekciyası jäne köşi-qon bölimi, Almatı qalası İşki sayasat basqarması jäne Köşi-qon policiyası qatarlı memlekettik mekemelerden ökilder şaqırılğan. Alayda, tikeley köşi-qon isine qatıstı otırısqa Köşi-qon policiyasınıñ ökilderi kelmey qaldı. Atalğan qwzırlı orınnıñ bwğan deyin de qandastar mäselesin talqığa salğan üstelden körine bermeytinin aytqımız keledi.

Qalalıq Köşi-qon policiyasınıñ ökiline berilgen orın bos twrdı. Foto: QT,

Jazuşı Qabdeş Jümädilov elge kelgen jäne şeteldegi qazaqtarğa qorğan bolu Qazaqstan ükimetiniñ mindeti ekenin ayta kelip: «60-şı jıldardıñ bas şeninde Qıtaydan 200 mıñnan asa qazaq Qazaqstanğa qonıs audardı. Sol twsta qwjattardı räsimdeude mwnday äureşiliktiñ biri de bolğan joq. Qonıstanğan audandarğa qatıstı mekemelerdiñ qızmetkerleri özderi kelip, birtwtas tizimge alıp, räsimdep ketti de jartı jılğa jetpey twtas qonıs audarıp kelgenderge «udostovereniesin» qoldarına bere saldı. Keñes odağınan saq, Keñes odağınıñ KGB-sinen ötken sekemşil eşkim joq, sonda da qwjattau, azamattığın beru jwmıstarın solay jasadı. Sol kezde qonıs audarğan qazaqtar da senimdi aqtadı, bir de bireuinen şikilik şıqqan joq, bäri de taza boldı.  Bügin odan da jaqsı jağdaydamız deymiz, Keñes odağınıñ bwl täjribesin qoldanuğa äbden bolar edi ğoy», – deydi qayratker qalamger.

Qalalıq Eñbek inspekciyası jäne köşi-qon basqarmasınıñ ökili Usabek Orazhanwlı.

Talqı otırısında Almatı qalalıq Eñbek inspekciyası jäne köşi-qon böliminiñ ökili Usabek Orazhanwlı söz alıp, atalğan mekemeniñ qızmetimen tanıstırıp ötti. «Bizdiñ basqarma Almatı qalasındağı Eñbek inspekciyası jäne köşi-qon basqarması, sonıñ işinde köşi-qon bölimi arnaulı «Oralman kuäligin beru memlekettik qızmetin» körsetemiz. Bwl qwjat şetelden kelgen qandastarımız  Qazaqstan azamattığın jeñildetilgen tärtippen alu üşin beriledi. Qwjattı alu üşin qandastarımızğa köp qiınşılıqtar joq, öziniñ jeke kuäligi men qazaq ekenin rastaytın qwjattarı arqılı 5 jwmıs küninde özi twrğan öñirdegi Halıqqa qızmet körsetu ortalıqtarınan ala aladı», – dedi.

Ol sonday-aq, Köşi-qon turalı zañğa soñğı engen özgeristerge (16 säuir 2018 jıl) säykes oralman kuäliginiñ uaqıtı ötip ketken jağdayda 6 ay işinde 1 märte 3 ayğa wzartıp beriletinin ayttı. Aldağı uaqıtta da köşi-qonğa baylanıstı zañdarğa jaña özgerister enui mümkin ekenin, qandastardıñ azamattıq alu jwmıstarına jeñildikter bolatınına senimin bildirdi. Sonday-aq, jiınğa qatısuşılardıñ qwjattıq mäselelerdegi swraqtarına jauap berdi.

"Elamanatı" birlestigi altı türli wsınıstı ortağa saldı.

“The Qazaq Times ”