كوشى-قون تاقىرىبىنداعى تالقىعا كوشى-قون پوليتسياسىنىڭ وكىلى كەلمەي قالدى

كەشە، 10 قاڭتار، الماتىدا ەلگە كەلگەن قانداستاردىڭ ازاماتتىق الۋ جانە قۇجاتتىق جۇمىستارىن جەڭىلدەتۋ ماسەلەسى بويىنشا «Elamanaty» قوعامدىق بىرلەستىگىنىڭ ۇيىمداستىرۋىمەن «تورتەۋ تۇگەل بولسا» اتتى دوڭگەلەك ۇستەل ءوتتى.

ەلگە كەلگەن قانداستاردىڭ قۇجات تاپسىرۋدا جانە ازاماتتىق الۋداعى قيىنشىلىقتارىن تاقىرىپ ەتكەن جينالىسقا قازاقستان حالىق جازۋشىسى قابدەش ءجۇمادىلوۆ، تاريح عىلىمدارىنىڭ دوكتورى، پروفەسسور ءنابيجان مۇحاممەدجان باستاعان زيالى قاۋىم وكىلدەرى مەن باق وكىلدەرى قاتىستى.

شارانى ۇيىمداستىرۋشى قوعامدىق بىرلەستىكتىڭ توراعاسى توقتاسىن رىسبەك بىرلەستىك اتىنان قانداستاردىڭ قۇجات راسىمدەۋدەگى كەزدەسەتىن ناقتى قيىنشىلىقتارىن جانە سوعان قاتىستى مەملەكەتتىك مەكەمەلەرگە 6 ءتۇرلى ۇسىنىسىن قويدى. سونىمەن قاتار ۇسىنىستارىن دوڭگەلەك ۇستەل تالقىسىنا سالدى.

جازۋشى قابدەش ءجۇمادىلوۆ ۇكىمەتتىڭ بۇل باعىتتاعى جۇمىسىن سىنعا الدى. فوتو: QT,

الماتى قالالىق ەڭبەك ينسپەكتسياسى جانە كوشى-قون ءبولىمى، الماتى قالاسى ىشكى ساياسات باسقارماسى جانە كوشى-قون پوليتسياسى قاتارلى مەملەكەتتىك مەكەمەلەردەن وكىلدەر شاقىرىلعان. الايدا، تىكەلەي كوشى-قون ىسىنە قاتىستى وتىرىسقا كوشى-قون پوليتسياسىنىڭ وكىلدەرى كەلمەي قالدى. اتالعان قۇزىرلى ورىننىڭ بۇعان دەيىن دە قانداستار ماسەلەسىن تالقىعا سالعان ۇستەلدەن كورىنە بەرمەيتىنىن ايتقىمىز كەلەدى.

قالالىق كوشى-قون پوليتسياسىنىڭ وكىلىنە بەرىلگەن ورىن بوس تۇردى. فوتو: QT,

جازۋشى قابدەش ءجۇمادىلوۆ ەلگە كەلگەن جانە شەتەلدەگى قازاقتارعا قورعان بولۋ قازاقستان ۇكىمەتىنىڭ مىندەتى ەكەنىن ايتا كەلىپ: «60-شى جىلداردىڭ باس شەنىندە قىتايدان 200 مىڭنان اسا قازاق قازاقستانعا قونىس اۋداردى. سول تۇستا قۇجاتتاردى راسىمدەۋدە مۇنداي اۋرەشىلىكتىڭ ءبىرى دە بولعان جوق. قونىستانعان اۋداندارعا قاتىستى مەكەمەلەردىڭ قىزمەتكەرلەرى وزدەرى كەلىپ، ءبىرتۇتاس تىزىمگە الىپ، راسىمدەپ كەتتى دە جارتى جىلعا جەتپەي تۇتاس قونىس اۋدارىپ كەلگەندەرگە «ۋدوستوۆەرەنيەسىن» قولدارىنا بەرە سالدى. كەڭەس وداعىنان ساق، كەڭەس وداعىنىڭ كگب-سىنەن وتكەن سەكەمشىل ەشكىم جوق، سوندا دا قۇجاتتاۋ، ازاماتتىعىن بەرۋ جۇمىستارىن سولاي جاسادى. سول كەزدە قونىس اۋدارعان قازاقتار دا سەنىمدى اقتادى، ءبىر دە بىرەۋىنەن شيكىلىك شىققان جوق، ءبارى دە تازا بولدى.  بۇگىن ودان دا جاقسى جاعدايدامىز دەيمىز، كەڭەس وداعىنىڭ بۇل تاجريبەسىن قولدانۋعا ابدەن بولار ەدى عوي»، – دەيدى قايراتكەر قالامگەر.

قالالىق ەڭبەك ينسپەكتسياسى جانە كوشى-قون باسقارماسىنىڭ وكىلى ۋسابەك ورازحانۇلى.

تالقى وتىرىسىندا الماتى قالالىق ەڭبەك ينسپەكتسياسى جانە كوشى-قون ءبولىمىنىڭ وكىلى ۋسابەك ورازحانۇلى ءسوز الىپ، اتالعان مەكەمەنىڭ قىزمەتىمەن تانىستىرىپ ءوتتى. «ءبىزدىڭ باسقارما الماتى قالاسىنداعى ەڭبەك ينسپەكتسياسى جانە كوشى-قون باسقارماسى، سونىڭ ىشىندە كوشى-قون ءبولىمى ارناۋلى «ورالمان كۋالىگىن بەرۋ مەملەكەتتىك قىزمەتىن» كورسەتەمىز. بۇل قۇجات شەتەلدەن كەلگەن قانداستارىمىز  قازاقستان ازاماتتىعىن جەڭىلدەتىلگەن تارتىپپەن الۋ ءۇشىن بەرىلەدى. قۇجاتتى الۋ ءۇشىن قانداستارىمىزعا كوپ قيىنشىلىقتار جوق، ءوزىنىڭ جەكە كۋالىگى مەن قازاق ەكەنىن راستايتىن قۇجاتتارى ارقىلى 5 جۇمىس كۇنىندە ءوزى تۇرعان وڭىردەگى حالىققا قىزمەت كورسەتۋ ورتالىقتارىنان الا الادى»، – دەدى.

ول سونداي-اق، كوشى-قون تۋرالى زاڭعا سوڭعى ەنگەن وزگەرىستەرگە (16 ءساۋىر 2018 جىل) سايكەس ورالمان كۋالىگىنىڭ ۋاقىتى ءوتىپ كەتكەن جاعدايدا 6 اي ىشىندە 1 مارتە 3 ايعا ۇزارتىپ بەرىلەتىنىن ايتتى. الداعى ۋاقىتتا دا كوشى-قونعا بايلانىستى زاڭدارعا جاڭا وزگەرىستەر ەنۋى مۇمكىن ەكەنىن، قانداستاردىڭ ازاماتتىق الۋ جۇمىستارىنا جەڭىلدىكتەر بولاتىنىنا سەنىمىن ءبىلدىردى. سونداي-اق، جيىنعا قاتىسۋشىلاردىڭ قۇجاتتىق ماسەلەلەردەگى سۇراقتارىنا جاۋاپ بەردى.

"ەلاماناتى" بىرلەستىگى التى ءتۇرلى ۇسىنىستى ورتاعا سالدى.

“The Qazaq Times ”