Qanat Islam DQQ-nıñ törağasınıñ birinşi orınbasarı jäne "Qandastar" qorınıñ prezidentimen kezdesti. Foto: DQQ.

Keşe, 13 jeltoqsan küni «Otandastar» qorı prezidenti Nwrtay Äbiqaev pen Düniejüzi qazaqtar Qauımdastığı (DQQ) Törağasınıñ birinşi orınbasarı Zauıtbek Twrısbekov belgili käsibi boksşı, birinşi orta salmaqtağı WBA Fedecaribe, WBA Fedelatin jäne WBA InterContinental, WBO NABO, WBO Intercontinental tituldıq ataqtarınıñ iegeri Qanat Islammen kezdesti.

Kezdesu barısında Nwrtay Äbiqaev 16 jeltoqsanda Astana qalasında Qanat Islam qwrğan promouterlik kompaniya wyımdastırıp jatqan käsipqoy boks keşiniñ sätti ötuine tilek bildirdi. Turnirdiñ bastı kezdesui – sportsüyer qauımğa «Qazaq batırı» degen laqap atpen belgili qıtaylıq qandasımız Elşat Nığımetollawlınıñ WBC ASIA çempiondıq titulı üşin jekpe-jegi eken. Qanat Islamnıñ aytuınşa, bwl Elşattıñ tarihi Otanında alğaş ret jwdırıqtasuı bolmaq.

Nwrtay Äbiqaev Qanat Islamğa Elbası tapsırmasımen şeteldik jäne elge oralğan qandastardı qoldauğa bağıttalğan «Otandastar» Qorınıñ maqsat-mindetterin tanıstırıp, aldağı jılğa josparlarımen bölisti. Qordıñ basşısı äygili sportşını ortaq müdde twrğısında eñbek pen küşti biriktiruge şaqırdı.

NWRTAY ÄBİQAEV – «OTANDASTAR» QORI PREZIDENTİ: «Otandastar» Qorınıñ qazirgi maqsatı – jastarmen tığız jwmıs isteu. 2019 jıldı Elbasımız Jastar jılı dep jariyaladı. Öz kezeginde, barşa qazaq jastarı öziñdi ağa dep biledi, erek sıylaydı. Olarğa el müddesin joğarı qoyğan wstanımıñmen, ömirlik tirşiligiñmen, sporttıq jolıñmen, adamgerşilik qwndılıqtardı nasihattauıñmen, salauattı közqarasıñmen ülgisiñ. Qazaqtıñ kök tuın biikke äueletip jürgen azamatsıñ. Elbası aytqan wlttıñ birigui twrğısında da älemniñ tükpir-tükpirinde tarıday şaşılğan qandastarımızdı bir şañıraqtıñ astında wyıstırıp jatqan eñbegiñ orasan. Bizdiñ «Otandastar» Qorınıñ öziñdey azamattarmen müddelerimiz ortaq. Sondıqtan, osı bağıtta küşimizdi biriktirsek, birge eñbek etsek, alınbaytın töbe, bağınbaytın qamal joq dep bilemin».

Düniejüzi qazaqtarı qauımdastığı Törağasınıñ birinşi orınbasarı Zauıtbek Twrısbekov belgili boksşı, älem çempionı Qanat Islamğa Qauımdastıqtıñ müşelik biletin tabıstadı.

ZAUITBEK TWRISBEKOV – DÜNIEJÜZİ QAZAQTAR QAUIMDASTIĞI TÖRAĞASINIÑ BİRİNŞİ ORINBASARI: «Otandastar» deytwğın Qor tek qazaqtar emes, köñili Qazaqstanğa bwrıp twratın dünie jüzindegi barşa azamattardıñ Qorı deuge negiz bar. Endi ğana täy-täy basıp jatqan wyım. Maqsatımız ortaq bolğandıqtan, öziñ de üles qosadı dep senemiz. Sebebi jastardıñ arasında sendik abıroy öte biik. Boksşılar älemde az emes, biraq jastar arasındağı biregeyi kim degende, birinşi bolıp öziñniñ atıñ ataladı. Qanat bauırımmen bwl kezdesudi – tarihi kezdesu dep bilem».

Qanat Islam orın alğan kezdesu men DQQ müşesi atağı üşin alğısın bildirip, öz kezeginde Täuelsizdik künine oray Astanada ötetin boks keşi turalı aytıp berdi. Turnirdiñ wyımdastıruşısı – Qanat Islam qwrğan «Qazaq promotions» promouterlik kompaniyası.  Boksşınıñ aytuınşa, reytingilik wpaylar üşin alıs-jaqın şetelderden kelgen qarsılastarmen Aydar Şarıbaev, Ashat Ualihanov, Abılayhan Qwsayınov, Ruslan Mırsataev sındı qazaqstandıqtar jwdırıqtasatın boladı.

«QAZAQ PROMOTIONS» kompaniyası Amerikanıñ iri promouterlik kompaniyalarımen birlesip, auqımdı boks keşterin wyımdastırumen aynalısadı. Şetelde biılğı köktemde ğana aşılğanımen, Qazaqstanda kompaniya eki jıldan beri jwmıs istep keledi.

QANAT ISLAM – KÄSİPQOY BOKSŞI: «Osınday auqımdı boks keşteriniñ arqasında qanşama qazaq boksşıları el aldına şığıp, önerin körsete aladı. İnilerimniñ de jwdırıqtasıp, tanılıp, talay belesti bağındıruın qalaymın. Promouterlik kompaniyamnıñ negizgi maqsatı da osı. Mümkindik barda, jastardı qoldau kerek dep esepteymin».

ANIQTAMA ÜŞİN:

Qanat Islam – qazaqtıñ käsipqoy boksşısı, birinşi orta salmaqtağı WBA Fedecaribe, WBA Fedelatin jäne WBA InterContinental, WBO NABO, WBO Intercontinental tituldıq ataqtarınıñ iegeri.

  • Laqap atı - Qazaq.
  • Äuesqoy boksşı retinde QHR Wlttıq qwrama komandasınıñ qwramında Pekin Olimpiadasınıñ qola jüldegeri, Çikagoda ötken Älem çempionatınıñ (2007) jäne Aziya oyındarınıñ (2006) qola jüldegeri, Qıtaydıñ 10 dürkin çempionı atanğan.
  • 2010 jılı azamattığın auıstırıp, atamekeni Qazaqstanğa köşip kelgen. "Astana Arlandarı" käsibi klubınıñ müşesi atanıp, 2012 jılğa deyin öner körsetti.
  • Sol jılı käsipqoy boksqa auısıp, Nel'son promouterlik klubı atınan şığa bastadı: 12 jekpe-jek ötkizip, onıñ 10-ın nokautpen jeñgen.
  • 2017 jılı sportşı Qazaqstannıñ memlekettik sıylığı «Qwrmet» ordenimen marapattaldı.

Baylanıs üşin:

«Otandastar» Qorı baspasöz hatşısı

Nazgül Nazar

8 778 998 75 01

nazgul.nazar93@gmail.com

“The Qazaq Times”