كەشە، 13 جەلتوقسان كۇنى «وتانداستار» قورى پرەزيدەنتى نۇرتاي ابىقاەۆ پەن دۇنيەجۇزى قازاقتار قاۋىمداستىعى (دقق) توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ بەلگىلى كاسىبي بوكسشى، ءبىرىنشى ورتا سالماقتاعى WBA Fedecaribe, WBA Fedelatin جانە WBA InterContinental, WBO NABO, WBO Intercontinental تيتۋلدىق اتاقتارىنىڭ يەگەرى قانات يسلاممەن كەزدەستى.
كەزدەسۋ بارىسىندا نۇرتاي ابىقاەۆ 16 جەلتوقساندا استانا قالاسىندا قانات يسلام قۇرعان پروموۋتەرلىك كومپانيا ۇيىمداستىرىپ جاتقان كاسىپقوي بوكس كەشىنىڭ ءساتتى وتۋىنە تىلەك ءبىلدىردى. ءتۋرنيردىڭ باستى كەزدەسۋى – سپورتسۇيەر قاۋىمعا «قازاق باتىرى» دەگەن لاقاپ اتپەن بەلگىلى قىتايلىق قانداسىمىز ەلشات نىعىمەتوللاۇلىنىڭ WBC ASIA چەمپيوندىق تيتۋلى ءۇشىن جەكپە-جەگى ەكەن. قانات يسلامنىڭ ايتۋىنشا، بۇل ەلشاتتىڭ تاريحي وتانىندا العاش رەت جۇدىرىقتاسۋى بولماق.
نۇرتاي ابىقاەۆ قانات يسلامعا ەلباسى تاپسىرماسىمەن شەتەلدىك جانە ەلگە ورالعان قانداستاردى قولداۋعا باعىتتالعان «وتانداستار» قورىنىڭ ماقسات-مىندەتتەرىن تانىستىرىپ، الداعى جىلعا جوسپارلارىمەن ءبولىستى. قوردىڭ باسشىسى ايگىلى سپورتشىنى ورتاق مۇددە تۇرعىسىندا ەڭبەك پەن كۇشتى بىرىكتىرۋگە شاقىردى.
نۇرتاي ابىقاەۆ – «وتانداستار» قورى پرەزيدەنتى: «وتانداستار» قورىنىڭ قازىرگى ماقساتى – جاستارمەن تىعىز جۇمىس ىستەۋ. 2019 جىلدى ەلباسىمىز جاستار جىلى دەپ جاريالادى. ءوز كەزەگىندە، بارشا قازاق جاستارى ءوزىڭدى اعا دەپ بىلەدى، ەرەك سىيلايدى. ولارعا ەل مۇددەسىن جوعارى قويعان ۇستانىمىڭمەن، ومىرلىك تىرشىلىگىڭمەن، سپورتتىق جولىڭمەن، ادامگەرشىلىك قۇندىلىقتاردى ناسيحاتتاۋىڭمەن، سالاۋاتتى كوزقاراسىڭمەن ۇلگىسىڭ. قازاقتىڭ كوك تۋىن بيىككە اۋەلەتىپ جۇرگەن ازاماتسىڭ. ەلباسى ايتقان ۇلتتىڭ بىرىگۋى تۇرعىسىندا دا الەمنىڭ تۇكپىر-تۇكپىرىندە تارىداي شاشىلعان قانداستارىمىزدى ءبىر شاڭىراقتىڭ استىندا ۇيىستىرىپ جاتقان ەڭبەگىڭ وراسان. ءبىزدىڭ «وتانداستار» قورىنىڭ وزىڭدەي ازاماتتارمەن مۇددەلەرىمىز ورتاق. سوندىقتان، وسى باعىتتا كۇشىمىزدى بىرىكتىرسەك، بىرگە ەڭبەك ەتسەك، الىنبايتىن توبە، باعىنبايتىن قامال جوق دەپ بىلەمىن».
دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ بەلگىلى بوكسشى، الەم چەمپيونى قانات يسلامعا قاۋىمداستىقتىڭ مۇشەلىك بيلەتىن تابىستادى.
زاۋىتبەك تۇرىسبەكوۆ – دۇنيەجۇزى قازاقتار قاۋىمداستىعى توراعاسىنىڭ ءبىرىنشى ورىنباسارى: «وتانداستار» دەيتۇعىن قور تەك قازاقتار ەمەس، كوڭىلى قازاقستانعا بۇرىپ تۇراتىن دۇنيە جۇزىندەگى بارشا ازاماتتاردىڭ قورى دەۋگە نەگىز بار. ەندى عانا ءتاي-ءتاي باسىپ جاتقان ۇيىم. ماقساتىمىز ورتاق بولعاندىقتان، ءوزىڭ دە ۇلەس قوسادى دەپ سەنەمىز. سەبەبى جاستاردىڭ اراسىندا سەندىك ابىروي وتە بيىك. بوكسشىلار الەمدە از ەمەس، بىراق جاستار اراسىنداعى بىرەگەيى كىم دەگەندە، ءبىرىنشى بولىپ ءوزىڭنىڭ اتىڭ اتالادى. قانات باۋىرىممەن بۇل كەزدەسۋدى – تاريحي كەزدەسۋ دەپ بىلەم».
قانات يسلام ورىن العان كەزدەسۋ مەن دقق مۇشەسى اتاعى ءۇشىن العىسىن ءبىلدىرىپ، ءوز كەزەگىندە تاۋەلسىزدىك كۇنىنە وراي استانادا وتەتىن بوكس كەشى تۋرالى ايتىپ بەردى. ءتۋرنيردىڭ ۇيىمداستىرۋشىسى – قانات يسلام قۇرعان «Qazaq promotions» پروموۋتەرلىك كومپانياسى. بوكسشىنىڭ ايتۋىنشا، رەيتينگىلىك ۇپايلار ءۇشىن الىس-جاقىن شەتەلدەردەن كەلگەن قارسىلاستارمەن ايدار شارىباەۆ، اسحات ۋاليحانوۆ، ابىلايحان قۇسايىنوۆ، رۋسلان مىرساتاەۆ سىندى قازاقستاندىقتار جۇدىرىقتاساتىن بولادى.
«QAZAQ PROMOTIONS» كومپانياسى امەريكانىڭ ءىرى پروموۋتەرلىك كومپانيالارىمەن بىرلەسىپ، اۋقىمدى بوكس كەشتەرىن ۇيىمداستىرۋمەن اينالىسادى. شەتەلدە بيىلعى كوكتەمدە عانا اشىلعانىمەن، قازاقستاندا كومپانيا ەكى جىلدان بەرى جۇمىس ىستەپ كەلەدى.
قانات يسلام – كاسىپقوي بوكسشى: «وسىنداي اۋقىمدى بوكس كەشتەرىنىڭ ارقاسىندا قانشاما قازاق بوكسشىلارى ەل الدىنا شىعىپ، ونەرىن كورسەتە الادى. ىنىلەرىمنىڭ دە جۇدىرىقتاسىپ، تانىلىپ، تالاي بەلەستى باعىندىرۋىن قالايمىن. پروموۋتەرلىك كومپانيامنىڭ نەگىزگى ماقساتى دا وسى. مۇمكىندىك باردا، جاستاردى قولداۋ كەرەك دەپ ەسەپتەيمىن».
انىقتاما ءۇشىن:
قانات يسلام – قازاقتىڭ كاسىپقوي بوكسشىسى، ءبىرىنشى ورتا سالماقتاعى WBA Fedecaribe, WBA Fedelatin جانە WBA InterContinental, WBO NABO, WBO Intercontinental تيتۋلدىق اتاقتارىنىڭ يەگەرى.
- لاقاپ اتى - قازاق.
- اۋەسقوي بوكسشى رەتىندە قحر ۇلتتىق قۇراما كومانداسىنىڭ قۇرامىندا پەكين وليمپياداسىنىڭ قولا جۇلدەگەرى، چيكاگودا وتكەن الەم چەمپيوناتىنىڭ (2007) جانە ازيا ويىندارىنىڭ (2006) قولا جۇلدەگەرى، قىتايدىڭ 10 دۇركىن چەمپيونى اتانعان.
- 2010 جىلى ازاماتتىعىن اۋىستىرىپ، اتامەكەنى قازاقستانعا كوشىپ كەلگەن. "استانا ارلاندارى" كاسىبي كلۋبىنىڭ مۇشەسى اتانىپ، 2012 جىلعا دەيىن ونەر كورسەتتى.
- سول جىلى كاسىپقوي بوكسقا اۋىسىپ، نەلسون پروموۋتەرلىك كلۋبى اتىنان شىعا باستادى: 12 جەكپە-جەك وتكىزىپ، ونىڭ 10-ىن نوكاۋتپەن جەڭگەن.
- 2017 جىلى سپورتشى قازاقستاننىڭ مەملەكەتتىك سىيلىعى «قۇرمەت» وردەنىمەن ماراپاتتالدى.
بايلانىس ءۇشىن:
«وتانداستار» قورى ءباسپاسوز حاتشىسى
نازگۇل نازار
8 778 998 75 01
nazgul.nazar93@gmail.com
وتانعا ورالعان قانداس بەيىمدەلۋى نەمەسە قانداستار مەن قازاقستانداعى ميگرانتتاردى اقپاراتتىق قولداۋ جانە الەۋمەتتىك بەيىمدەۋدىڭ مەديا-ستراتەگياسى
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
مەشىن جىلدىڭ قارا ولەڭى
موڭعوليا استاناسىندا جاپپاي نارازىلىق شەرۋلەرى ءوتتى