Il'han Omar. Foto: GETTY IMAGES/BBC.

6 qaraşada ötken saylau AQŞ sayasatındağı bwrılıs retinde qaldı. Osı retki saylauda Qwrama Ştat tarihında alğaş ret Kongreske mwsılman äyelder saylandı. Bwl jolı saylauğa tüsken ümitkerler arasındağı mwsılmandardıñ sanı rekordtıq körsetkişke deyin jetti. Saylauğa qatısqan mwsılman kandidattar sanı 100-ge jetken.

Solardıñ arasında Raşida Talib pen Il'han Omar erekşe közge tüsti. Ekeui de Demokrattardıñ ümitkeri retinde prezident Tramptıñ migraciya sayasatı men mwsılmandarğa qarsı sözderin sınğa alğan.  Sonday-aq, Tramptıñ qatañ migraciyalıq şekteulerine küşti qarsılıq tanıtıp, Qwrama Ştatta qarjı jäne migraciyalıq policiyanı joyu bastamaların kötergen.

Somalilik bosqın Il'han Omar

Il'han Omar bala küninde üy-işimen Somaliden ketken. Bir mezgil Keniyadağı bosqındar lagerinde jasap, keyin Minneapoliske barğan. Ol saylau aldında amerikalıq basılımdarğa bergen swhbatında: «Kongreske barudağı bastı maqsatım – demokratiyanıñ qanday bolatının körsetu», – degen. Ol Kongreske saylanğan jeñisi turalı: «Bwl bosqındar lagerinde 8 jıl ömir sürgen qızdıñ jeñisi boldı; bwl erkinen tıs zorlıqpen küyeuge berilgen mwsılman qızınıñ jeñisi; bwl armanday alatın ärbir adamnıñ jeñisi» – dedi amerikalıq BAQ-qa.

Raşida Talib. Foto: REUTERS.

Bosqın otbasıdan şıqqan Raşida Talib

Raşida Tadib palestinalıq bosqın otbasınan şıqqan. Ol Miçigan ştatınan AQŞ-tıñ memlekettik palatasına saylanıp bardı. Ol 2008 jılı Miçigan ştatınıñ ökilder palatasına müşe bolğan alğaşqı mwsılman äyel.

Kezekti saylauğa qatısudağı bastı maqsatın «Tramptıñ migraciyalıq sayasatına qarsı küresu» dep tüsindirgen. Anığında, mwsılman elderindegi azamattardıñ AQŞ-qa keluine tiım salu isine qarsı maydanda. Ol ABC arnasına bergen swhbatında: «Meniñ jeñisim tarihta qalsın degen oymen saylauğa qatıspadım. Men ädildik üşin, islam dinin wstanudan küdiktenken wldarım üşin saylauğa qatıstım. Men ünsiz qarap twratındardıñ qatarınan emespin», – degen. Ol bwl saylauda afroamerikalıqtar köbirek twratın aymaqta wtıp şıqtı.

AQŞ-tağı aralıq saylau nätijesi Trampqa qolaylı bolmay şıqtı. Demokrattar el palatasındağı basım köp orındı ieledi. Olar segiz jıldan beri alğaş ret tömengi palatada basım sayasi küşke ie bolıp, prezident Tramptıñ sayasatın tezge saluğa mümkindik alıp otır.

“The Qazaq Times”