يلحان ومار. فوتو: GETTY IMAGES/BBC.

6 قاراشادا وتكەن سايلاۋ اقش ساياساتىنداعى بۇرىلىس رەتىندە قالدى. وسى رەتكى سايلاۋدا قۇراما شتات تاريحىندا العاش رەت كونگرەسكە مۇسىلمان ايەلدەر سايلاندى. بۇل جولى سايلاۋعا تۇسكەن ۇمىتكەرلەر اراسىنداعى مۇسىلمانداردىڭ سانى رەكوردتىق كورسەتكىشكە دەيىن جەتتى. سايلاۋعا قاتىسقان مۇسىلمان كانديداتتار سانى 100-گە جەتكەن.

سولاردىڭ اراسىندا راشيدا تاليب پەن يلحان ومار ەرەكشە كوزگە ءتۇستى. ەكەۋى دە دەموكراتتاردىڭ ۇمىتكەرى رەتىندە پرەزيدەنت ترامپتىڭ ميگراتسيا ساياساتى مەن مۇسىلماندارعا قارسى سوزدەرىن سىنعا العان.  سونداي-اق، ترامپتىڭ قاتاڭ ميگراتسيالىق شەكتەۋلەرىنە كۇشتى قارسىلىق تانىتىپ، قۇراما شتاتتا قارجى جانە ميگراتسيالىق پوليتسيانى جويۋ باستامالارىن كوتەرگەن.

سوماليلىك بوسقىن يلحان ومار

يلحان ومار بالا كۇنىندە ءۇي-ىشىمەن سوماليدەن كەتكەن. ءبىر مەزگىل كەنياداعى بوسقىندار لاگەرىندە جاساپ، كەيىن ميننەاپوليسكە بارعان. ول سايلاۋ الدىندا امەريكالىق باسىلىمدارعا بەرگەن سۇحباتىندا: «كونگرەسكە بارۋداعى باستى ماقساتىم – دەموكراتيانىڭ قانداي بولاتىنىن كورسەتۋ»، – دەگەن. ول كونگرەسكە سايلانعان جەڭىسى تۋرالى: «بۇل بوسقىندار لاگەرىندە 8 جىل ءومىر سۇرگەن قىزدىڭ جەڭىسى بولدى; بۇل ەركىنەن تىس زورلىقپەن كۇيەۋگە بەرىلگەن مۇسىلمان قىزىنىڭ جەڭىسى; بۇل ارمانداي الاتىن ءاربىر ادامنىڭ جەڭىسى» – دەدى امەريكالىق باق-قا.

راشيدا تاليب. فوتو: REUTERS.

بوسقىن وتباسىدان شىققان راشيدا تاليب

راشيدا تاديب پالەستينالىق بوسقىن وتباسىنان شىققان. ول ميچيگان شتاتىنان اقش-تىڭ مەملەكەتتىك پالاتاسىنا سايلانىپ باردى. ول 2008 جىلى ميچيگان شتاتىنىڭ وكىلدەر پالاتاسىنا مۇشە بولعان العاشقى مۇسىلمان ايەل.

كەزەكتى سايلاۋعا قاتىسۋداعى باستى ماقساتىن «ترامپتىڭ ميگراتسيالىق ساياساتىنا قارسى كۇرەسۋ» دەپ تۇسىندىرگەن. انىعىندا، مۇسىلمان ەلدەرىندەگى ازاماتتاردىڭ اقش-قا كەلۋىنە تيىم سالۋ ىسىنە قارسى مايداندا. ول ABC ارناسىنا بەرگەن سۇحباتىندا: «مەنىڭ جەڭىسىم تاريحتا قالسىن دەگەن ويمەن سايلاۋعا قاتىسپادىم. مەن ادىلدىك ءۇشىن، يسلام ءدىنىن ۇستانۋدان كۇدىكتەنكەن ۇلدارىم ءۇشىن سايلاۋعا قاتىستىم. مەن ءۇنسىز قاراپ تۇراتىنداردىڭ قاتارىنان ەمەسپىن»، – دەگەن. ول بۇل سايلاۋدا افروامەريكالىقتار كوبىرەك تۇراتىن ايماقتا ۇتىپ شىقتى.

اقش-تاعى ارالىق سايلاۋ ناتيجەسى ترامپقا قولايلى بولماي شىقتى. دەموكراتتار ەل پالاتاسىنداعى باسىم كوپ ورىندى يەلەدى. ولار سەگىز جىلدان بەرى العاش رەت تومەنگى پالاتادا باسىم ساياسي كۇشكە يە بولىپ، پرەزيدەنت ترامپتىڭ ساياساتىن تەزگە سالۋعا مۇمكىندىك الىپ وتىر.

“The Qazaq Times”