Foto: politnavigator.net

Resey prezidenti Vladimir Putin Ukrainağa sankciya saluğa baylanıstı qwjatqa qol qoydı.

Kreml' baspasöz qızmetiniñ mälimetinşe, qazan ayınıñ 22-i küni Vladimir Putin Ukrainağa sankciya saluğa qatıstı bwyrıqqa qol qoyğan. Resmi Mäskeu taratqan aqparat boyınşa, Reseydiñ Ukrainağa sankciya saluına Kievtiñ Resey Federaciyasınıñ azamattarı men zañdı twlğalarına qarsı qoldanğan is-äreketteri sebep bolğan.

Sankciyalıq tizim prezident qol qoyğan sätten bastap küşine enedi. Al ol tizimge kimderdiñ enetinin Reseydiñ ükimet müşeleri anıqtaytın boladı. Sankciya öz küşin Ukraina biligi Resey azamattarına qarsı qoldanıp jatqan is-äreketterin toqtatqan küni joyadı.

Ayta ketetin bir jayt, bwğan deyin qırküyek ayında Ukraina biligi «LNR-men» qatısı bar birqatar reseylik kompaniyalar men azamattıq twlğalarğa sankciya salğan.

"The Qazaq Times"