Foto: static.life.ru

Wlıbritaniya prem'er-ministri Tereza Mey Europa Odağımen (EO) Brexit şeşimine qatıstı ortaq äreket etetinin ayttı.

Financial Times-tiñ habarlauınşa, äzirşe London men Bryussel' ekeuara kelisimge kelgen joq. Memlekette ekiwdayı pikir qalıptassa da, prem'er-ministr kelissözdiñ sätti bolatına jäne «qatañ Brexit» josparınsız-aq odaqtan şığatınına senimdi.

Osığan deyin Meyge qarsılıq bildiruşi top prem'erge senimsizdik bildiretin joldaudı dayındap qoyğan bolatın. VVS telearnası saraptamalıq habarlardıñ birinde Tereza Meydiñ Euroodaqtan şığu jaylı şeşiminiñ mülde sın kötermeytinin aytıp, onıñ elu şaqtı äriptesi birlesip ministrler kabinetiniñ jetekşisin bilikten ketiru üşin «sayasi scenariy» qwrastırğanın mälimdegen. Olardıñ oyınşa, Meydiñ «mağınasız mälimdemesi memleketti qwldıratadı».

Eske sala keteyik, Wlıbritaniya EO-dan 2019 jıldıñ naurızında şığadı dep josparlanğan. Leyborister men basqa da oppoziciyalıq küşter bwl şeşimge tübegeyli qarsılıq bildirdi. Soğan qaramastan, Britaniya ükimeti biıl şildede odaq qwramınan şığu turalı kelisim jobasın wsındı. Kelisimge säykes, Wlıbritaniya Europanıñ ortaq narığında auılşaruaşılığı tauarların şekteusiz saudalay aladı jäne ekonomikalıq jağdayda europalıq standarttardı saqtau mümkindigine ie boladı. Eger Meydiñ josparı jüzege assa, Birikken Korol'dik aldağı on jıl işinde Euroodaqqa 40 milliardqa juıq euro töleydi.

"The Qazaq Times"