Bügin, 8-qırküyekte Almatı qalasında qala äkimdigi men «BAURZHAN Foundation»  qoğamdıq qayırımdılıq qorınıñ mwrındıq boluımen «KITAR FEST – 2018» Halıqaralıq kitap festivali ötude.

"Jılda ötkiziletin osı mereke biıl 5-ret wyımdastırıluda. Bastapqıda kişigirim kitap almasu retinde bastalğan bwl körmeniñ qazir özderiñiz de körip twrğanday, auqımı keñeyude. Biıl tek kitap almasu ğana emes, kitap järmeñkesi de ötude. Oğan 30-dan astam kitap dükenderi men kitap baspaları özderiniñ kitaptarın  qala twrğındarına wsınuda. Bizdiñ osı järmeñkeni wyımdastırudağı bastı maqsatımız — qazaqstandıq jazuşılar men baspagerlerdi qoldau, qala twrğındarınıñ kitapqa degen süyispenşiligi men qızığuşılığın oyatu, adamdar arasında kitap oqu mädenietin damıtıp, otandıq jazuşılar men oqırmandardıñ basın qosu. Osı jılı «BAURZHAN Foundation»  qoğamdıq qayırımdılıq qorı men «Meloman» kitap dükeni birlesip, kitabı köp satılımğa ie bolğan qazaqstandıq jazuşınıñ kitabın tañdamaq. Bizdiñ tañdauımızğa ilikken, yağni kitabı öte köp satılğan aqın nemese jazuşı kelesi jılı «Meloman» kitap dükeniniñ qoldauımen kitabın tegin şığaru qwqığına ie boladı", - deydi «KITAR FEST – 2018» festival'iniñ bas jetekşisi Mayra Al'janova.

Festival' ötkiziletin orında birneşe şatır tigilgen. Olardıñ ärqaysısında özindik şaralar ötude. Mäselen, jazuşılarğa arnalğan şatırda qazaqstandıq jazuşılar özderiniñ 2017-2018 jıldarı jarıq körgen kitaptarımen tanıstırdı. Onda Arman Älmembet, Almaz Şarman, Natal'ya Mahno, Hakim Bulibekov, Oleg Çervinskiy sındı jazuşılar söz alıp, oqırmandar swrağına jauap berdi. Sonımen qatar, blogerler şatırında Aydos Sarım, Diana Snegina, Ayna Dosmahambetqızı, Marina Şaripova, Aysana Äşim siyaqtı elimizge tanımal qoğam qayratkerleri, jurnalister, blogerler oqırmandarmen kitapqa baylanıstı qızıqtı oyların bölisti.

Osı kitap järmeñkesiniñ dästürli şarası ayasında kitapsüyer qauım «Kitap almasu» bağdarlaması arqılı özderiniñ kitaphanaların türlendire aladı. YAğni, oqırmandar öz kitaptarın äkelip, almastıru arqılı, türli kitap janrlarına tolı söreden qalağan kitaptarına qol jetkize aladı. Sonımen qatar, baspalar men internet-dükender körmege öz tauarların qoyıp, jaña tanıstırılımdarğa da orın berildi. Wyımdastıruşılardıñ aytuınşa, bwl järmeñkede kitaptar ädettegi qwnınan 10-15 payızğa tömen bağağa satılğan. Järmeñkege keluşilerdiñ jartısınan köbin jastar men oquşılar qwrağanı da köñilimizdi quantıp tastadı. Äsirese, «kitap almasu» söresi mañında kitapqa talasqan oqırmandardıñ, sonıñ işinde jastardıñ sol äreketinen «Qazaqstanda kitap oqılmaydı» degen pikirdiñ negizsiz aytılğanına kuä bolğandaymız. Odan bölek, kitap basıp şığaru isine arnalğan şatırdan özderine qızıqtı aqparattar alıp qaluğa tırısqan studentterden elimizde baspa isiniñ bolaşağınan köp ümit kütuge bolatının añğardıq.

Foto: Qoñır Mwqataeva

« ...Bärimizdiñ de kitaptı ruhani qwndılıq dep tüsinetinimiz anıq. Alayda, älemde kitap narıqtıñ, biznestiñ bir türi. Sondıqtan da, kitap şığarılım mağlwmattarı, basılım aqparattarı siyaqtı, barlıq standartqa say boluı kerek. Sonda ğana kitap öziniñ twtınuşısına tolıqqandı qızmet ete aladı. Qazirgi uaqıtta elimizde osı salanıñ mamandarı joq dey almaymın. Täuelsizdigimizge qol jetkizgeli beri biz de baspa isiniñ mamandarın dayındap jatırmız. «Biz» dep otırğanım — Äl-Farabi atındağı Qazaq Wlttıq universiteti, Jurnalistka fakul'tetiniñ «Baspagerlik-redaktorlıq jäne dizaynerlik öner» kafedrası. Atalğan kafedra özimizdiñ wlttıq naqışta bezendire alatın dizaynerler men kitaptıñ qoljazbasınan bastap oqırmannıñ tilegi men swranısın qanağattandıruğa deyingi barlıq talaptardı orınday alatın baspagerler dayındauda elimizdiñ jetekşi oqu ornı dep ayta alamın. Endi, sonday mamandardı dayındap jatqandıqtan,  biz studentterimizdi körme-järmeñkelerge äkelip twramız.  Äri, tek körme-järmeñkelermen ğana şektelmey, barlıq baspalarmen tığız qarım-qatınastamız». Al, endi mına körmege jinalğan qanşama halıqtı körip, «Qazaqstanda eşkim kitapqa qızıqpaydı, kitap oqımaydı» dep qalay ayta alamız? , - deydi QR Baspa jäne poligrafiya isiniñ eñbek siñirgen qayratkeri, äl-Farabi atındağı Qazaq Wlttıq universitettiñ Jurnalistka fakul'tetiniñ Baspagerlik-redaktorlıq jäne dizaynerlik öner kafedrasınıñ oqıtuşısı Qoñır Mwqataeva.

Tüyin: Jıl sayın auqımı keñeyip, otandıq aqın-jazuşılar men oqırmandardıñ, blogerlerdiñ, qoğam qayratkerleriniñ basın qosıp, qalamızdıñ mädeni-ağartuşılıq is-şarasına aynalıp kele jatqan festivaldiñ elimizdiñ kitap şığaru salasına qosar ülesi äli alda dep senemiz.

“The Qazaq Times”