فوتو: QT

بۇگىن، 8-قىركۇيەكتە الماتى قالاسىندا قالا اكىمدىگى مەن «BAURZHAN Foundation»  قوعامدىق قايىرىمدىلىق قورىنىڭ مۇرىندىق بولۋىمەن «KITAر FEST – 2018» حالىقارالىق كىتاپ فەستيۆالى وتۋدە.

"جىلدا وتكىزىلەتىن وسى مەرەكە بيىل 5-رەت ۇيىمداستىرىلۋدا. باستاپقىدا كىشىگىرىم كىتاپ الماسۋ رەتىندە باستالعان بۇل كورمەنىڭ قازىر وزدەرىڭىز دە كورىپ تۇرعانداي، اۋقىمى كەڭەيۋدە. بيىل تەك كىتاپ الماسۋ عانا ەمەس، كىتاپ جارمەڭكەسى دە وتۋدە. وعان 30-دان استام كىتاپ دۇكەندەرى مەن كىتاپ باسپالارى وزدەرىنىڭ كىتاپتارىن  قالا تۇرعىندارىنا ۇسىنۋدا. ءبىزدىڭ وسى جارمەڭكەنى ۇيىمداستىرۋداعى باستى ماقساتىمىز — قازاقستاندىق جازۋشىلار مەن باسپاگەرلەردى قولداۋ، قالا تۇرعىندارىنىڭ كىتاپقا دەگەن سۇيىسپەنشىلىگى مەن قىزىعۋشىلىعىن وياتۋ، ادامدار اراسىندا كىتاپ وقۋ مادەنيەتىن دامىتىپ، وتاندىق جازۋشىلار مەن وقىرمانداردىڭ باسىن قوسۋ. وسى جىلى «BAURZHAN Foundation»  قوعامدىق قايىرىمدىلىق قورى مەن «مەلومان» كىتاپ دۇكەنى بىرلەسىپ، كىتابى كوپ ساتىلىمعا يە بولعان قازاقستاندىق جازۋشىنىڭ كىتابىن تاڭداماق. ءبىزدىڭ تاڭداۋىمىزعا ىلىككەن، ياعني كىتابى وتە كوپ ساتىلعان اقىن نەمەسە جازۋشى كەلەسى جىلى «مەلومان» كىتاپ دۇكەنىنىڭ قولداۋىمەن كىتابىن تەگىن شىعارۋ قۇقىعىنا يە بولادى", - دەيدى «KITAر FEST – 2018» فەستيۆالىنىڭ باس جەتەكشىسى مايرا الجانوۆا.

فەستيۆال وتكىزىلەتىن ورىندا بىرنەشە شاتىر تىگىلگەن. ولاردىڭ ارقايسىسىندا وزىندىك شارالار وتۋدە. ماسەلەن، جازۋشىلارعا ارنالعان شاتىردا قازاقستاندىق جازۋشىلار وزدەرىنىڭ 2017-2018 جىلدارى جارىق كورگەن كىتاپتارىمەن تانىستىردى. وندا ارمان المەمبەت، الماز شارمان، ناتاليا ماحنو، حاكيم بۋليبەكوۆ، ولەگ چەرۆينسكي سىندى جازۋشىلار ءسوز الىپ، وقىرماندار سۇراعىنا جاۋاپ بەردى. سونىمەن قاتار، بلوگەرلەر شاتىرىندا ايدوس سارىم، ديانا سنەگينا، اينا دوسماحامبەتقىزى، مارينا شاريپوۆا، ايسانا ءاشىم سياقتى ەلىمىزگە تانىمال قوعام قايراتكەرلەرى، جۋرناليستەر، بلوگەرلەر وقىرماندارمەن كىتاپقا بايلانىستى قىزىقتى ويلارىن ءبولىستى.

وسى كىتاپ جارمەڭكەسىنىڭ ءداستۇرلى شاراسى اياسىندا كىتاپسۇيەر قاۋىم «كىتاپ الماسۋ» باعدارلاماسى ارقىلى وزدەرىنىڭ كىتاپحانالارىن تۇرلەندىرە الادى. ياعني، وقىرماندار ءوز كىتاپتارىن اكەلىپ، الماستىرۋ ارقىلى، ءتۇرلى كىتاپ جانرلارىنا تولى سورەدەن قالاعان كىتاپتارىنا قول جەتكىزە الادى. سونىمەن قاتار، باسپالار مەن ينتەرنەت-دۇكەندەر كورمەگە ءوز تاۋارلارىن قويىپ، جاڭا تانىستىرىلىمدارعا دا ورىن بەرىلدى. ۇيىمداستىرۋشىلاردىڭ ايتۋىنشا، بۇل جارمەڭكەدە كىتاپتار ادەتتەگى قۇنىنان 10-15 پايىزعا تومەن باعاعا ساتىلعان. جارمەڭكەگە كەلۋشىلەردىڭ جارتىسىنان كوبىن جاستار مەن وقۋشىلار قۇراعانى دا كوڭىلىمىزدى قۋانتىپ تاستادى. اسىرەسە، «كىتاپ الماسۋ» سورەسى ماڭىندا كىتاپقا تالاسقان وقىرمانداردىڭ، سونىڭ ىشىندە جاستاردىڭ سول ارەكەتىنەن «قازاقستاندا كىتاپ وقىلمايدى» دەگەن پىكىردىڭ نەگىزسىز ايتىلعانىنا كۋا بولعاندايمىز. ودان بولەك، كىتاپ باسىپ شىعارۋ ىسىنە ارنالعان شاتىردان وزدەرىنە قىزىقتى اقپاراتتار الىپ قالۋعا تىرىسقان ستۋدەنتتەردەن ەلىمىزدە باسپا ءىسىنىڭ بولاشاعىنان كوپ ءۇمىت كۇتۋگە بولاتىنىن اڭعاردىق.

فوتو: قوڭىر مۇقاتاەۆا

« ...ءبارىمىزدىڭ دە كىتاپتى رۋحاني قۇندىلىق دەپ تۇسىنەتىنىمىز انىق. الايدا، الەمدە كىتاپ نارىقتىڭ، بيزنەستىڭ ءبىر ءتۇرى. سوندىقتان دا، كىتاپ شىعارىلىم ماعلۇماتتارى، باسىلىم اقپاراتتارى سياقتى، بارلىق ستاندارتقا ساي بولۋى كەرەك. سوندا عانا كىتاپ ءوزىنىڭ تۇتىنۋشىسىنا تولىققاندى قىزمەت ەتە الادى. قازىرگى ۋاقىتتا ەلىمىزدە وسى سالانىڭ ماماندارى جوق دەي المايمىن. تاۋەلسىزدىگىمىزگە قول جەتكىزگەلى بەرى ءبىز دە باسپا ءىسىنىڭ ماماندارىن دايىنداپ جاتىرمىز. «ءبىز» دەپ وتىرعانىم — ءال-فارابي اتىنداعى قازاق ۇلتتىق ۋنيۆەرسيتەتى، جۋرناليستكا فاكۋلتەتىنىڭ «باسپاگەرلىك-رەداكتورلىق جانە ديزاينەرلىك ونەر» كافەدراسى. اتالعان كافەدرا ءوزىمىزدىڭ ۇلتتىق ناقىشتا بەزەندىرە الاتىن ديزاينەرلەر مەن كىتاپتىڭ قولجازباسىنان باستاپ وقىرماننىڭ تىلەگى مەن سۇرانىسىن قاناعاتتاندىرۋعا دەيىنگى بارلىق تالاپتاردى ورىنداي الاتىن باسپاگەرلەر دايىنداۋدا ەلىمىزدىڭ جەتەكشى وقۋ ورنى دەپ ايتا الامىن. ەندى، سونداي مامانداردى دايىنداپ جاتقاندىقتان،  ءبىز ستۋدەنتتەرىمىزدى كورمە-جارمەڭكەلەرگە اكەلىپ تۇرامىز.  ءارى، تەك كورمە-جارمەڭكەلەرمەن عانا شەكتەلمەي، بارلىق باسپالارمەن تىعىز قارىم-قاتىناستامىز». ال، ەندى مىنا كورمەگە جينالعان قانشاما حالىقتى كورىپ، «قازاقستاندا ەشكىم كىتاپقا قىزىقپايدى، كىتاپ وقىمايدى» دەپ قالاي ايتا الامىز؟ ، - دەيدى قر باسپا جانە پوليگرافيا ءىسىنىڭ ەڭبەك سىڭىرگەن قايراتكەرى، ءال-فارابي اتىنداعى قازاق ۇلتتىق ۋنيۆەرسيتەتتىڭ جۋرناليستكا فاكۋلتەتىنىڭ باسپاگەرلىك-رەداكتورلىق جانە ديزاينەرلىك ونەر كافەدراسىنىڭ وقىتۋشىسى قوڭىر مۇقاتاەۆا.

ءتۇيىن: جىل سايىن اۋقىمى كەڭەيىپ، وتاندىق اقىن-جازۋشىلار مەن وقىرمانداردىڭ، بلوگەرلەردىڭ، قوعام قايراتكەرلەرىنىڭ باسىن قوسىپ، قالامىزدىڭ مادەني-اعارتۋشىلىق ءىس-شاراسىنا اينالىپ كەلە جاتقان فەستيۆالدىڭ ەلىمىزدىڭ كىتاپ شىعارۋ سالاسىنا قوسار ۇلەسى ءالى الدا دەپ سەنەمىز.

“The Qazaq Times”