2019 jılı ötetin halıq sanağına 8,8 milliard teñge bölinetin boldı. Bwl turalı Wlttıq ekonomika ministri Timur Süleymenov habarladı.

Ministr mırzanıñ sözinşe, 2019 jıldıñ qaraşa ayında ötetin halıq sanağına el byudjetinen 8,8 milliard teñge qarjı bölu qarastırılğan. Bwl jolğı wlttıq halıq sanağınıñ erekşeligi sanaq tolıqtay komp'yuterlik jüye boyınşa jürgiziledi jäne kez kelgen adam arnayı internet portalğa kirip, öziniñ jeke mälimetterin körsetu arqılı sanaq jüyesine tirkele aladı.

Statistika agenttiginiñ eks-basşısı Anar Meşimbaeva. Foto. tengrinews.kz

Esteriñizge salayıq, 2009 jıl bolğan halıq sanağına el byudjetinen 1 mlrd 144 mln teñge bölingen. Keyinnen sol kezde statistika agenttiginiñ törayımı bolğan Anar Meşimbaevağa halıq sanağına bölingen 700 million teñge qarjını jımqırdı degen ayıp tağılıp, 2014 jıldıñ 14 aqpanında Astana qalasınıñ Esil audandıq sotı eks-törayımdı 7 jılğa bas bostandığınan ayırğan.

Jalpı, sol kezde bölingen qarjı men jımqırılğan qarjını esepteytin bolsaq, 2009 jılğı halıq sanağına Meşimbaeva hanım jımqırğan 700 million teñgeni alıp tastağanda 444 million teñge jwmsalğan. Arada 10 jıl ötken soñ Wlttıq ekonomika ministrligi Täuelsizdik alğan 27 jılda ne bäri 18 millionnan säl ğana asqan halıqtı sanaqtan ötkizuge 8,8 milliard teñge qarjı bölmek. Swraq: Soñğı on jılda halıq sanağın ötkizu osınşalıqtı deñgeyde qımbattağan ba, joq älde Wlttıq ekonomika ministrligi 18 million halıqqa sanaq jüyesine tirkelu üşin bas-basına bir-bir komp'yuter satıp alıp bermek pe?

"The Qazaq Times"