Qazaqstan SİM Qayrat Äbdirahmanov.

Qazaqstannıñ sırtqı ister ministri Qayrat Äbdirahmanov reseylik RIA Novosti agenttigine bergen swhbatında Kaspiyde AQŞ äskeri bazası ornalaspaydı dep mälimdegen.

Ministrdiñ aytuınşa, bwl Kaspiy jağalauında ornalasqan bes el basşıları kelisken konvenciyadağı principterge qayşı. Konvenciyada Kaspiyge böten taraptardıñ äskeri küşin ornalastırmau jaylı princip bekitilgen.

Ministr keybir Resey aqparat qwraldarı men sarapşılardıñ Qazaqstan arqılı ötetin amerikalıq äskeri emes jükterdiñ tranzitine qatıstı mäseleden jetkilikti därejede habardar emestigin atap ötken.

Äbdirahmanovtıñ aytuınşa, mäsele äue arqılı tasımaldanbaytın, temirjol arqılı ötetin kommerciyalıq jükter jaylı bolıp otır - bwl auğan ükimetin qoldau operaciyasın jalğastıru üşin qajet.

“Mäsele Kaspiyde AQŞ-tıñ äskeri bazasın ornalastıru nemese özge şet memlekettiñ äskeri bazasın ornalastıru jaylı bolıp otırğan joq” dedi ministr.

Qayrat Äbdirahmanovtıñ sözinşe, mwnday tranzit üşin tek Qazaqstan emes, özge elderdiñ de territoriyası qoldanılıp kelgen. Qazaqstan tek Aqtau, Qwrıq porttarı arqılı jükterdiñ tasımaldanuına mümkindik berip, punkterdi tolıqtırıp otır.

2018 jılı 19 säuirde Qazaqstan parlamenti Auğanstanğa jükterdi jetkizu turalı AQŞ-pen aradağı kelisimge engizilgen tüzetulerdi maqwldağan. AQŞ-tıñ Auğanstandı qalpına keltiru josparına säykes, Qazaqstan arqılı jükti ötkizuge qatıstı hattamanı prezident Nwrswltan Nazarbaevtıñ qabıldağanı turalı aqparat memlekettik BAQ-ta mamırdıñ 5-i küni jariyalanğan.

“The Qazaq Times”