قازاقستان ءسىم قايرات ءابدىراحمانوۆ.

قازاقستاننىڭ سىرتقى ىستەر ءمينيسترى قايرات ءابدىراحمانوۆ رەسەيلىك ريا نوۆوستي اگەنتتىگىنە بەرگەن سۇحباتىندا كاسپيدە اقش اسكەري بازاسى ورنالاسپايدى دەپ مالىمدەگەن.

ءمينيستردىڭ ايتۋىنشا، بۇل كاسپي جاعالاۋىندا ورنالاسقان بەس ەل باسشىلارى كەلىسكەن كونۆەنتسياداعى پرينتسيپتەرگە قايشى. كونۆەنتسيادا كاسپيگە بوتەن تاراپتاردىڭ اسكەري كۇشىن ورنالاستىرماۋ جايلى پرينتسيپ بەكىتىلگەن.

مينيستر كەيبىر رەسەي اقپارات قۇرالدارى مەن ساراپشىلاردىڭ قازاقستان ارقىلى وتەتىن امەريكالىق اسكەري ەمەس جۇكتەردىڭ ترانزيتىنە قاتىستى ماسەلەدەن جەتكىلىكتى دارەجەدە حاباردار ەمەستىگىن اتاپ وتكەن.

ءابدىراحمانوۆتىڭ ايتۋىنشا، ماسەلە اۋە ارقىلى تاسىمالدانبايتىن، تەمىرجول ارقىلى وتەتىن كوممەرتسيالىق جۇكتەر جايلى بولىپ وتىر - بۇل اۋعان ۇكىمەتىن قولداۋ وپەراتسياسىن جالعاستىرۋ ءۇشىن قاجەت.

“ماسەلە كاسپيدە اقش-تىڭ اسكەري بازاسىن ورنالاستىرۋ نەمەسە وزگە شەت مەملەكەتتىڭ اسكەري بازاسىن ورنالاستىرۋ جايلى بولىپ وتىرعان جوق” دەدى مينيستر.

قايرات ءابدىراحمانوۆتىڭ سوزىنشە، مۇنداي ترانزيت ءۇشىن تەك قازاقستان ەمەس، وزگە ەلدەردىڭ دە تەرريتورياسى قولدانىلىپ كەلگەن. قازاقستان تەك اقتاۋ، قۇرىق پورتتارى ارقىلى جۇكتەردىڭ تاسىمالدانۋىنا مۇمكىندىك بەرىپ، پۋنكتەردى تولىقتىرىپ وتىر.

2018 جىلى 19 ساۋىردە قازاقستان پارلامەنتى اۋعانستانعا جۇكتەردى جەتكىزۋ تۋرالى اقش-پەن اراداعى كەلىسىمگە ەنگىزىلگەن تۇزەتۋلەردى ماقۇلداعان. اقش-تىڭ اۋعانستاندى قالپىنا كەلتىرۋ جوسپارىنا سايكەس، قازاقستان ارقىلى جۇكتى وتكىزۋگە قاتىستى حاتتامانى پرەزيدەنت نۇرسۇلتان نازارباەۆتىڭ قابىلداعانى تۋرالى اقپارات مەملەكەتتىك باق-تا مامىردىڭ 5-ءى كۇنى جاريالانعان.

“The Qazaq Times”