Türki Keñesine müşe memleketter - Qazaqstan, Äzerbayjan, Qırğızstan jäne Türkiya «Zamanaui Jibek jolı» turistik paketin äzirlep jatır.

Birlesken turistik önim älem turisteriniñ Jibek jolı elderin tiimdi aralauına mümkindik bermek.  Joba ayasında «Kazakh Tourism» Wlttıq kompaniyası» AQ basqarma törağasınıñ orınbasarı Timur Düysenğaliev Ortalıq Aziya öñiriniñ jarnamasın köbeytudi wsındı.

«Türkiya - turizm salasındağı ülken narıq, biraq qazirgi uaqıtta Ortalıq Aziyada sayahattap jürgen türkiyalıqtı keziktiru qiın. Turizm salasında Qazaqstan, Türkiya men Äzerbayjan turisterine öte mañızdı jobalardı wsına aladı. Bir ğana Altay - barlıq türki halıqtarınıñ tarihi otanı bolıp sanaladı. Keşe ğana Tarbağataydan tağı bir Altın adam tabıldı. Bizdiñ däuirimizge deyingi 8-7 ğasırlarğa tiesili bwl qazbadan 10 mıñğa juıq altın äşekeyler tabıldı. Bwl - älemdik mañızı bar jañalıq. Ekinşi qızıqtı bağıt - Qazaqstannıñ oñtüstigindegi Türkistan aymağı. Barşa türki halqı täu etetin Türkistan qalasınıñ öñir astanası atanuı da turizmge erekşe qoldau bolıp otır. Odan bölek, Sırdariya mañındağı dalada türkilerdiñ Altaydan keyingi ekinşi astanası - YAngikent qalaşığı bar», - dedi «Kazakh Tourism» Wlttıq kompaniyası» AQ basqarma törağasınıñ orınbasarı Timur Düysenğaliev Astanada turizm boyınşa Türki keñesi jwmıs tobınıñ 13-şi otırısında.

Sonımen birge, T. Düysenğaliev Kaspiy teñizinde kruizdik turizmdi damıtu qajettigin atap ötti.

Wyımdastıruşılardıñ aytuınşa, «Zamanaui Jibek jolı» jobası boyınşa alğaşqı sapar tamızdıñ soñı men qırküyek ayınıñ basında Qazaqstan men Qırğızstanda jürgizilmek. Sapar barısında turister Üşinşi bükilälemdik köşpendiler oyının tamaşalay aladı.

Sonday-aq, jiın barısında «Zamanaui Jibek jolı» turistik paketiniñ veb-saytı tanıstırıldı. Onda turister jii baratın Qazaqstandağı Qoja Ahmet YAssaui kesenesi, Äzerbayjandağı Keruen saray, Qırğızstandağı Taş Rabat jäne Istanbwldağı Ülken bazar turalı mağlwmattar berilgen.

Eske sala ketsek, erteñ - 8 tamız küni Astanada Türki keñesine müşe memleketterdiñ turizm ministrleriniñ törtinşi jiını ötedi.

 “The Qazaq Times”