تۇركى كەڭەسىنە مۇشە مەملەكەتتەر - قازاقستان، ازەربايجان، قىرعىزستان جانە تۇركيا «زاماناۋي جىبەك جولى» تۋريستىك پاكەتىن ازىرلەپ جاتىر.

بىرلەسكەن تۋريستىك ءونىم الەم تۋريستەرىنىڭ جىبەك جولى ەلدەرىن ءتيىمدى ارالاۋىنا مۇمكىندىك بەرمەك.  جوبا اياسىندا «Kazakh Tourism» ۇلتتىق كومپانياسى» اق باسقارما توراعاسىنىڭ ورىنباسارى تيمۋر دۇيسەنعاليەۆ ورتالىق ازيا ءوڭىرىنىڭ جارناماسىن كوبەيتۋدى ۇسىندى.

«تۇركيا - تۋريزم سالاسىنداعى ۇلكەن نارىق، بىراق قازىرگى ۋاقىتتا ورتالىق ازيادا ساياحاتتاپ جۇرگەن تۇركيالىقتى كەزىكتىرۋ قيىن. تۋريزم سالاسىندا قازاقستان، تۇركيا مەن ازەربايجان تۋريستەرىنە وتە ماڭىزدى جوبالاردى ۇسىنا الادى. بىر عانا التاي - بارلىق تۇركى حالىقتارىنىڭ تاريحي وتانى بولىپ سانالادى. كەشە عانا تارباعاتايدان تاعى ءبىر التىن ادام تابىلدى. ءبىزدىڭ داۋىرىمىزگە دەيىنگى 8-7 عاسىرلارعا تيەسىلى بۇل قازبادان 10 مىڭعا جۋىق التىن اشەكەيلەر تابىلدى. بۇل - الەمدىك ماڭىزى بار جاڭالىق. ەكىنشى قىزىقتى باعىت - قازاقستاننىڭ وڭتۇستىگىندەگى تۇركىستان ايماعى. بارشا تۇركى حالقى ءتاۋ ەتەتىن تۇركىستان قالاسىنىڭ ءوڭىر استاناسى اتانۋى دا تۋريزمگە ەرەكشە قولداۋ بولىپ وتىر. ودان بولەك، سىرداريا ماڭىنداعى دالادا تۇركىلەردىڭ التايدان كەيىنگى ەكىنشى استاناسى - يانگيكەنت قالاشىعى بار»، - دەدى «Kazakh Tourism» ۇلتتىق كومپانياسى» اق باسقارما توراعاسىنىڭ ورىنباسارى تيمۋر دۇيسەنعاليەۆ استانادا تۋريزم بويىنشا تۇركى كەڭەسى جۇمىس توبىنىڭ 13-ءشى وتىرىسىندا.

سونىمەن بىرگە، ت. دۇيسەنعاليەۆ كاسپي تەڭىزىندە كرۋيزدىك ءتۋريزمدى دامىتۋ قاجەتتىگىن اتاپ ءوتتى.

ۇيىمداستىرۋشىلاردىڭ ايتۋىنشا، «زاماناۋي جىبەك جولى» جوباسى بويىنشا العاشقى ساپار تامىزدىڭ سوڭى مەن قىركۇيەك ايىنىڭ باسىندا قازاقستان مەن قىرعىزستاندا جۇرگىزىلمەك. ساپار بارىسىندا تۋريستەر ءۇشىنشى بۇكىلالەمدىك كوشپەندىلەر ويىنىن تاماشالاي الادى.

سونداي-اق، جيىن بارىسىندا «زاماناۋي جىبەك جولى» تۋريستىك پاكەتىنىڭ ۆەب-سايتى تانىستىرىلدى. وندا تۋريستەر ءجيى باراتىن قازاقستانداعى قوجا احمەت ياسساۋي كەسەنەسى، ازەربايجانداعى كەرۋەن ساراي، قىرعىزستانداعى تاش رابات جانە ىستانبۇلداعى ۇلكەن بازار تۋرالى ماعلۇماتتار بەرىلگەن.

ەسكە سالا كەتسەك، ەرتەڭ - 8 تامىز كۇنى استانادا تۇركى كەڭەسىنە مۇشە مەملەكەتتەردىڭ تۋريزم مينيسترلەرىنىڭ ءتورتىنشى جيىنى وتەدى.

 “The Qazaq Times”