Ärtürli sebeptermen aqşamızdı  büldirip alatın kezderimiz köp. Biri kiimniñ qaltasında ketken kupyuranı abaysızda juıp alsa, endi biri onı jırtıp, ne küydirip alıp jatadı. Aqşañızdı büldirip alsañız, ne isteuge boladı? Jırtılğan aqşanı qayda ötkizemiz? Bülingen aqşanı bankter qabılday ma? Kez-kelgen bank jırtılıp qalğan aqşanı auıstıra ma?

Eger kupyura teñge bolsa, Wlttıq bank onı op-oñay auıstırıp beredi. Al eger bülingen aqşa şeteldik valyuta bolsa onda onı ayırbastau qiındau boladı. Biz bankterge habarlasıp körgenimizde, Almatı qalasında tölemge jaramsız bolıp qalğan şeteldik kupyuralardı qabıldaytın sanaulı ğana ayırbas orındarı bar ekendigin jäne olardıñ öz qızmetteri üşin bülingen qarajattıñ 20 nemese 30 payızın wstap qalatındığın anıqtadıq.

QR Wlttıq Bank Basqarmasınıñ 2012 jıldıñ 24 tamızdağı № 253 qaulısımen bekitilgen Wlttıq valyutanıñ bülingen aqşa belgilerin ayırbastau Qazaqstan Respublikası wlttıq valyutasınıñ aynalıstan alınatın jäne alınğan banknottarı men monetaların, sonday-aq Qazaqstan Respublikası wlttıq valyutasınıñ tozğan jäne bülingen banknottarı men monetaların ayırbastau qağidalarınıñ 7-tarmağına säykes,tozğan jäne bülingen banknottar men monetalar barlıq bankterde jäne Wlttıq Banktiñ filialdarında belgilengen qwnı boyınşa, qanday da bolmasın şekteulersiz ayırbastaladı.

Wlttıq valyutanıñ bülingen aqşa belgilerin ayırbastau tegin jasaladı. Ayırbastalatın aqşa belgileriniñ soması şektelmegen. Ekinşi deñgeydegi bankterge jäne Wlttıq Bank filialdarına kelip tüsken kez kelgen zaqımdarı bar aqşa belgileri aynalısqa şığarılmaydı.  YAğni, tozğan jäne bülingen, öziniñ tolıq köleminiñ keminde 70 procenti saqtalğan banknottardı Wlttıq Banki jäne ekinşi deñgeydegi bankter şekteusiz ayırbastaydı.

Al şetelderde Qazaqstanmen salıstırğanda bülingen aqşağa küdikpen qaraydı. Olardıñ tüsiniginde aqşa tek bankterde ğana saqtaluı kerek. Al köp kölemde, küygen aqşa alıp kelseñ, bwl aqşanıñ qanday da bir qılmısqa qatısı bar dep oylaydı. Onı auıstırıp alu üşin arnayı qwjat jiıp, olardı abaysızda büldirip alğanıñdı däleldeuiñ kerek. Biraq osınıñ barlığına qaramastan qabıldap aluşı tarap bülingen aqşağa arnayı saraptama tağayındap, onıñ bülingenge deyin jürip ötken jolın tekseredi.

“The Qazaq Times”