ءارتۇرلى سەبەپتەرمەن اقشامىزدى  ءبۇلدىرىپ الاتىن كەزدەرىمىز كوپ. ءبىرى كيىمنىڭ قالتاسىندا كەتكەن كۋپيۋرانى ابايسىزدا جۋىپ السا، ەندى ءبىرى ونى جىرتىپ، نە كۇيدىرىپ الىپ جاتادى. اقشاڭىزدى ءبۇلدىرىپ الساڭىز، نە ىستەۋگە بولادى؟ جىرتىلعان اقشانى قايدا وتكىزەمىز؟ بۇلىنگەن اقشانى بانكتەر قابىلداي ما؟ كەز-كەلگەن بانك جىرتىلىپ قالعان اقشانى اۋىستىرا ما؟

ەگەر كۋپيۋرا تەڭگە بولسا، ۇلتتىق بانك ونى وپ-وڭاي اۋىستىرىپ بەرەدى. ال ەگەر بۇلىنگەن اقشا شەتەلدىك ۆاليۋتا بولسا وندا ونى ايىرباستاۋ قيىنداۋ بولادى. ءبىز بانكتەرگە حابارلاسىپ كورگەنىمىزدە، الماتى قالاسىندا تولەمگە جارامسىز بولىپ قالعان شەتەلدىك كۋپيۋرالاردى قابىلدايتىن ساناۋلى عانا ايىرباس ورىندارى بار ەكەندىگىن جانە ولاردىڭ ءوز قىزمەتتەرى ءۇشىن بۇلىنگەن قاراجاتتىڭ 20 نەمەسە 30 پايىزىن ۇستاپ قالاتىندىعىن انىقتادىق.

قر ۇلتتىق بانك باسقارماسىنىڭ 2012 جىلدىڭ 24 تامىزداعى № 253 قاۋلىسىمەن بەكىتىلگەن ۇلتتىق ۆاليۋتانىڭ بۇلىنگەن اقشا بەلگىلەرىن ايىرباستاۋ قازاقستان رەسپۋبليكاسى ۇلتتىق ۆاليۋتاسىنىڭ اينالىستان الىناتىن جانە الىنعان بانكنوتتارى مەن مونەتالارىن، سونداي-اق قازاقستان رەسپۋبليكاسى ۇلتتىق ۆاليۋتاسىنىڭ توزعان جانە بۇلىنگەن بانكنوتتارى مەن مونەتالارىن ايىرباستاۋ قاعيدالارىنىڭ 7-تارماعىنا سايكەس،توزعان جانە بۇلىنگەن بانكنوتتار مەن مونەتالار بارلىق بانكتەردە جانە ۇلتتىق بانكتىڭ فيليالدارىندا بەلگىلەنگەن قۇنى بويىنشا، قانداي دا بولماسىن شەكتەۋلەرسىز ايىرباستالادى.

ۇلتتىق ۆاليۋتانىڭ بۇلىنگەن اقشا بەلگىلەرىن ايىرباستاۋ تەگىن جاسالادى. ايىرباستالاتىن اقشا بەلگىلەرىنىڭ سوماسى شەكتەلمەگەن. ەكىنشى دەڭگەيدەگى بانكتەرگە جانە ۇلتتىق بانك فيليالدارىنا كەلىپ تۇسكەن كەز كەلگەن زاقىمدارى بار اقشا بەلگىلەرى اينالىسقا شىعارىلمايدى.  ياعني، توزعان جانە بۇلiنگەن، ءوزiنiڭ تولىق كولەمiنiڭ كەمiندە 70 پروتسەنتi ساقتالعان بانكنوتتاردى ۇلتتىق بانكi جانە ەكىنشى دەڭگەيدەگى بانكتەر شەكتەۋسiز ايىرباستايدى.

ال شەتەلدەردە قازاقستانمەن سالىستىرعاندا بۇلىنگەن اقشاعا كۇدىكپەن قارايدى. ولاردىڭ تۇسىنىگىندە اقشا تەك بانكتەردە عانا ساقتالۋى كەرەك. ال كوپ كولەمدە، كۇيگەن اقشا الىپ كەلسەڭ، بۇل اقشانىڭ قانداي دا ءبىر قىلمىسقا قاتىسى بار دەپ ويلايدى. ونى اۋىستىرىپ الۋ ءۇشىن ارنايى قۇجات جيىپ، ولاردى ابايسىزدا ءبۇلدىرىپ العانىڭدى دالەلدەۋىڭ كەرەك. بىراق وسىنىڭ بارلىعىنا قاراماستان قابىلداپ الۋشى تاراپ بۇلىنگەن اقشاعا ارنايى ساراپتاما تاعايىنداپ، ونىڭ بۇلىنگەنگە دەيىن ءجۇرىپ وتكەن جولىن تەكسەرەدى.

“The Qazaq Times”