Bügin Almatı qalasında «Jaña Qazaqstan» forumınıñ müşeleri baspasöz mäslihatın ötkizdi.

Baspasöz mäslihatında forum müşeleri Ämirjan Qosanov, Dos Köşim, Aydos Sarım jäne Rasul Jwmalı prem'er-ministr Baqıtjan Sağıntaevqa joldanğan aşıq hat jöninde, «Jaña Qazaqstan» müşeleriniñ mausım ayınıñ 24-i men 27-i künderi aralığındağı AQŞ-qa saparı jöninde mälimdeme jasadı.

Sayasatker, Ämirjan Qosanov. Foto: QT

Jiınnıñ moderatorı retinde alğaşqılardıñ biri bolıp söz alğan «Jaña Qazaqstan» müşesi, oppoziciyalıq sayasatker, Ämirjan Qosanov Qazaqstan aumağına köşiriledi delingen 51 Qıtay zauıtına qatıstı prem'er-miristrge hat joldağandıqtarın ayttı. Qosanov mırzanıñ sözinşe, aşıq hatta forum müşeleri ükimet basşısınan Qıtay käsiporındarınıñ el ekonomikasına paydası, ekologiyalıq ziyanı, jwmıs küşiniñ kimderden qwralatını jäne zauıttardıñ kimniñ ieliginde bolatındığı jöninde saualdar qoyğan.

Sayasattanuşı, Rasul Jwmalı. Foto: QT

Al öz kezeginde sayasattanuşı, Rasul Jwmalı forum müşeleriniñ AQŞ-qa saparına qısqaşa toqtaldı. Ol öz sözinde: «Ötken aptada bir top «Jaña Qazaqstan» forumınıñ ökilderi Uaşingtonğa barıp qayttıq. Bwl sapar barısında bizge sırtta jürgen birqatar qazaq belsendileri qosıldı. Olardıñ işinde Qazaqstan oppoziciyasınıñ şeteldegi byurosınıñ basşısı Serik Medetbekov, filosof Uälihan Tüleşov, Qanat Ibragimov sındı azamattar bar. Sapar arısında Qazaqstandağı söz bostandığı, aqparattıq qauipsizdik, bilik tranziti, Qıtaydağı qazaq mäselesi jöninde köptegen taqırıptar talqılandı» - dep mälimdedi.

Sayasattanuşı, Aydos Sarım. Foto: QT

Rasul Jwmalıdan keyin AQŞ saparına qatıstı sayasattanuşı Aydos Sarım öz pikirin bılay dep bildirdi: «Birinşiden, «nege AQŞ sapar?» - degen swraqqa jauap bereyin. Bügingi küni geosayasi kontekst kürdelenip baradı. Qazaqstandağı Resey men Qıtaydıñ ıqpalı asa ayırıqşa därejege jetti. Ekinşiden, Qıtaydağı qazaq mäselesi. Qazir Qazaqstannıñ Qıtayğa äleueti jetpeydi, sözi ötpeydi. Biz bilsek, birşama adam qwqığı mäselesin aytatın eki top bar. Onıñ biri Euroodaq bolsa, biri AQŞ. Biz Europarlamentke barğanan keyin deputattarmen qandastarımızdı kezdestirip jolın aşıp berdik. Osı jolıda sonday diplomatiyalıq joldardı kördik. Özderiñiz bilesizder qazir AQŞ Qıtaymen birşama mäselege kelip jatır. Bälkim osını paydalanıp pa, joq älde basqa joldardı paydalanıp pa Şıñjañdağı qazaq mäselesin şeşemiz be degen ümitimiz bar».

Sayasattanuşı, Dos Köşim. Foto: QT

Öz kezeginde baspasöz mäslihatın qorıtındılağan sayasattanuşı, Dos Köşim bılay dedi: «Osı aydıñ basında biz Mañğıstau jäne Aqtöbe oblısında jergilikti halıqpen kezdesu ötkizdik jäne halıqtıñ «Jaña Qazaqstanğa» qatıstı swraqtarına jauap berdik. Qazirgi kezde ekonomika, wlttıq mäsele barlığıda tığırıqqa tireldi. Bwdan bılay bwnday qoğamda ömir süruge bolmaydı. Biz osı aydıñ ayağınan bastap oblıstardı aralauğa şığamız».

 

“The Qazaq Times”