بۇگىن الماتى قالاسىندا «جاڭا قازاقستان» فورۋمىنىڭ مۇشەلەرى ءباسپاسوز ءماسليحاتىن وتكىزدى.

ءباسپاسوز ءماسليحاتىندا فورۋم مۇشەلەرى ءامىرجان قوسانوۆ، دوس كوشىم، ايدوس سارىم جانە راسۋل جۇمالى پرەمەر-مينيستر باقىتجان ساعىنتاەۆقا جولدانعان اشىق حات جونىندە، «جاڭا قازاقستان» مۇشەلەرىنىڭ ماۋسىم ايىنىڭ 24-ءى مەن 27-ءى كۇندەرى ارالىعىنداعى اقش-قا ساپارى جونىندە مالىمدەمە جاسادى.

ساياساتكەر، ءامىرجان قوسانوۆ. فوتو: QT

جيىننىڭ مودەراتورى رەتىندە العاشقىلاردىڭ ءبىرى بولىپ ءسوز العان «جاڭا قازاقستان» مۇشەسى، وپپوزيتسيالىق ساياساتكەر، ءامىرجان قوسانوۆ قازاقستان اۋماعىنا كوشىرىلەدى دەلىنگەن 51 قىتاي زاۋىتىنا قاتىستى پرەمەر-ميريسترگە حات جولداعاندىقتارىن ايتتى. قوسانوۆ مىرزانىڭ سوزىنشە، اشىق حاتتا فورۋم مۇشەلەرى ۇكىمەت باسشىسىنان قىتاي كاسىپورىندارىنىڭ ەل ەكونوميكاسىنا پايداسى، ەكولوگيالىق زيانى، جۇمىس كۇشىنىڭ كىمدەردەن قۇرالاتىنى جانە زاۋىتتاردىڭ كىمنىڭ يەلىگىندە بولاتىندىعى جونىندە ساۋالدار قويعان.

ساياساتتانۋشى، راسۋل جۇمالى. فوتو: QT

ال ءوز كەزەگىندە ساياساتتانۋشى، راسۋل جۇمالى فورۋم مۇشەلەرىنىڭ اقش-قا ساپارىنا قىسقاشا توقتالدى. ول ءوز سوزىندە: «وتكەن اپتادا ءبىر توپ «جاڭا قازاقستان» فورۋمىنىڭ وكىلدەرى ۋاشينگتونعا بارىپ قايتتىق. بۇل ساپار بارىسىندا بىزگە سىرتتا جۇرگەن بىرقاتار قازاق بەلسەندىلەرى قوسىلدى. ولاردىڭ ىشىندە قازاقستان وپپوزيتسياسىنىڭ شەتەلدەگى بيۋروسىنىڭ باسشىسى سەرىك مەدەتبەكوۆ، فيلوسوف ءۋاليحان تۇلەشوۆ، قانات يبراگيموۆ سىندى ازاماتتار بار. ساپار ارىسىندا قازاقستانداعى ءسوز بوستاندىعى، اقپاراتتىق قاۋىپسىزدىك، بيلىك ءترانزيتى، قىتايداعى قازاق ماسەلەسى جونىندە كوپتەگەن تاقىرىپتار تالقىلاندى» - دەپ مالىمدەدى.

ساياساتتانۋشى، ايدوس سارىم. فوتو: QT

راسۋل جۇمالىدان كەيىن اقش ساپارىنا قاتىستى ساياساتتانۋشى ايدوس سارىم ءوز پىكىرىن بىلاي دەپ ءبىلدىردى: «بىرىنشىدەن، «نەگە اقش ساپار؟» - دەگەن سۇراققا جاۋاپ بەرەيىن. بۇگىنگى كۇنى گەوساياسي كونتەكست كۇردەلەنىپ بارادى. قازاقستانداعى رەسەي مەن قىتايدىڭ ىقپالى اسا ايىرىقشا دارەجەگە جەتتى. ەكىنشىدەن، قىتايداعى قازاق ماسەلەسى. قازىر قازاقستاننىڭ قىتايعا الەۋەتى جەتپەيدى، ءسوزى وتپەيدى. ءبىز بىلسەك، ءبىرشاما ادام قۇقىعى ماسەلەسىن ايتاتىن ەكى توپ بار. ونىڭ ءبىرى ەۋرووداق بولسا، ءبىرى اقش. ءبىز ەۋروپارلامەنتكە بارعانان كەيىن دەپۋتاتتارمەن قانداستارىمىزدى كەزدەستىرىپ جولىن اشىپ بەردىك. وسى جولىدا سونداي ديپلوماتيالىق جولداردى كوردىك. وزدەرىڭىز بىلەسىزدەر قازىر اقش قىتايمەن ءبىرشاما ماسەلەگە كەلىپ جاتىر. بالكىم وسىنى پايدالانىپ پا، جوق الدە باسقا جولداردى پايدالانىپ پا شىڭجاڭداعى قازاق ماسەلەسىن شەشەمىز بە دەگەن ءۇمىتىمىز بار».

ساياساتتانۋشى، دوس كوشىم. فوتو: QT

ءوز كەزەگىندە ءباسپاسوز ءماسليحاتىن قورىتىندىلاعان ساياساتتانۋشى، دوس كوشىم بىلاي دەدى: «وسى ايدىڭ باسىندا ءبىز ماڭعىستاۋ جانە اقتوبە وبلىسىندا جەرگىلىكتى حالىقپەن كەزدەسۋ وتكىزدىك جانە حالىقتىڭ «جاڭا قازاقستانعا» قاتىستى سۇراقتارىنا جاۋاپ بەردىك. قازىرگى كەزدە ەكونوميكا، ۇلتتىق ماسەلە بارلىعىدا تىعىرىققا تىرەلدى. بۇدان بىلاي بۇنداي قوعامدا ءومىر سۇرۋگە بولمايدى. ءبىز وسى ايدىڭ اياعىنان باستاپ وبلىستاردى ارالاۋعا شىعامىز».

 

“The Qazaq Times”