Hat

Sizder bwl hattı oqıp otırğanda, men aspanğa anama qaray ketip bara jatamın.

Men Marina apayıma jäne dostarım Lina, Marta, Maks pen Eruqağa arnap hat jazıp ketkim keldi. Sosın, ol oyımdı wlğaytıp barlıqtarıñızğa arnap jazğım keldi.

Meni eldiñ bäri Sani deydi. Osında kelgeli atımdı Aşen mama Jim dep özgertti. Jim da jaman emes, biraq özime Sani wnaydı. Öytkeni mamam tüsimde meni «Sani! meniñ aqıldı Saniım» dep ataydı.

Marina apaydı osında kelgenşe mama dep ataytınmın, tek Aşen mama «endi mamañ menmin, Marina mamañ osıdan bılay apay boladı» dep qwlağımnan sozıp twrıp eskertti. Biraq, Aşen mama meni şapalaqpen tartıp jebergen kezde, men eriksiz «mama» dep marina apaydı esime alıp jılaymın.

Men öz mamamdı äli körgen joqpın. Tek tüsimde körgenimmen, oyanğanda öñin wmıtıp qalamın. Ärdayım wyıqtar aldında mamamnıñ türin esimde mıqtap saqtap qalayınşı dep qwdaydan qanşa tilep jatsam da, bäribir oyanğan soñ wmıtıp qala beremin.

Al, Linanıñ maması bar, ol kelip twradı. Biraq Marina apay onı işke jibermeydi. Öytkeni, ol ılğıi araq işip jüredi. Sosın köşedegi qoqıs jäşigindegi jemisterdi alıp keledi. Marta men Makstıñ mamaları joq. Lena apay ayına bir ret keledi. Ol kelgen kezde bizdiñ şağın balar üyinde ülken toy. Lena apay tauıq pisirip äkeledi, jäne ärqaysımızğa birden jwmırtqa, iä bolmasa är jerin qwrt jese de, tazalap juılğan alma ne almwrt alıp keledi. Olardıñ da mamaları joq. Tağı basqa köp balalardıñ da mamaları joq. Tek keybireuiniñ äkeleri bar. Olar kelip twradı. Biraq  Lina, Marta, Maks pen Eruqa beseumiz ğana mamamızdı sağınamız. Bizdiñ papamızdıñ joq ekenin bilemiz. sosın ol turalı oylanıp körgemiz joq.

Aşen mama meni alıp ketkeli kelgende qattı qinaldım. Mağan onı Eruqa ayttı. «Seni erteñ alıp ketedi, bireuler asırap aladı eken» dedi. Men olar taba almay qalsın dep, Martanıñ töseginiñ astına tığılıp alğanımmen, bäribir olar tauıp aldı. Meni jibermeymin dep talasqan Makstı otjağatın Matey ağay iterip qalğanda, onıñ bası tösektiñ sirağına tiip jarılıp qaldı. Ol oğan qaramay qayta jügirgen, endi Matey ağay onıñ qwlağınan şap berip wstap aldı da üsteldegi pışaqtı qolına wstap mağan: «Sani endi tınıştalıp Aşen mamañmen birge ketpeseñ, Makstıñ eki qwlağın birdey kesip alamın» dedi. Makstıñ qwlağın kesip tastamasın dep men ünsiz eruge mäjbür boldım.

Men mwnda kelgeli tura on jeti kün boldı. Aşen mamam meni on eki ret sabadı. Men bärin sanap jürmin. Äsili, on üş ret bolatın tek keşe tündegi wrğanın esepke almaymın. Öytkeni, ol aşulanıp jürip bayqamay mamama baratın joldı aytıp qoydı.

Tünde tüsimde tağı mamam kirdi. Osı jolı men onıñ jüzin anıq kördim. Ol sonday appaq eken. Tipten onday swlu mama eşkimde joq. Ol mağan:

– Twr Sani ketmiz,  – tura esiktiñ tübinde twrıp şaqırdı. Men ornımnan atıp twrıp, esikke qaray twra jügirgenimde anam körinbey ketti.

«Mama» dep, qattı ayqaylap jiberip edim,  Aşen mama oyanıp ketip meniñ şaşımnan süyrep äkelip, tösegime laqtırıp jiberdi de:

– Osıdan tañ atsın men seni mına 25 qabattıñ terezesinen dalağa laqtırıp jiberem. Sonda kezigetin bolasıñ mamañmen, – dedi.

Bwrın teledidardan biikten qwlağandardıñ jerge qaray tüsetinin körgenmin. Biraq, men jerge qaray emes aspanğa, mamama qaray wşıp bara jatamın. Barlıqtarıñız sau bolıñızdar. Qoş. Men mamama kettim.

Mistik

«The Qazaq Times»