Änşi, wstaz Erkin Şükimanov. Foto: Maturidi.kz

5 aqpan keşte, Almatıdağı Alatau dästürli öner teatrında, qazaq dästürli än öneriniñ şoqtığı biik änşisi, Qazaqstan Respublikasınıñ eñbek siñirgen qayratkeri Erkin Şükimanovtıñ «Alqoñır» attı şığarmaşılıq keşi bolıp ötti. The Qazaq Times habarlaydı.

Erkin Şükimanovtıñ şığarmaşılıq keşi. Foto: The Qazaq Times

Keşke änşi Erkin Şükimanovtıñ töl şäkirtterimen qatar, Alatau dästürli öner teatrınıñ änşi önerpazdarı qatıstı. Şığarmaşılıq keşiniñ şımıldığın Säken Seyfulliınnıñ «Tau işinde» änimen aştı. Arı qaray «Şaşubaydıñ äni», Mwstafa Bürkitbaywlınıñ «Bürkitbay», halıq änine aynalğan Segiz seriniñ «Gauhartasın», halıqqa «Mariyam Jagorqızınıñ äni» nemese «Dudaraydıñ äni» atanıp ketken, Tölebaydıñ äni «Dudaraydı» orındap, kezegin şäkirtterine berdi.

Änşiniñ şärkirtteri än orındau öneriniñ är qırınan şeberlikterin körsetti. Azat Dulatwlı bwrın eş jerde orındalmağan halıq äni «Qaraköz» tartu etse, Qaztay Aqımet qobızben än aytu dästürin jañğırtıp, halıq äni «Gülder-ayımdı» orındadı. Än arasında sıbızğı mwrasın nasihattauşı, önertanu ğılımdarınıñ kandidatı, sıbızğışı Talğat Mwqıs keş boyauın asırdı.

Sahnağa qayta oralğan keş iesi – Erkin Şükimanov keştiñ «Alqoñır» atına oray, qazaqtıñ bir qatar qoñır änderimen tıñdauşısın tänti etti. Halıq äni «Alqoñır», Aqan seriniñ «Maydaqoñırı», Estaydıñ «Jayqoñırı» men köp jıl sahına körmegen «Kişi qoñır» änderin orındadı. Halıq äni «Naz qoñırdan» keyin änşi keş kezegin tağıda öz şäkirtterine berdi.

Nariman Qajımwratwlı «Imanjüsiptiñ änin» orındasa, halıq äni «Eki jirenniñ» jwrt köp tıñday bermeytin nwsqasın Erkin Şükimanovtıñ tañdaulı şäkirtiniñ bir, Alatau teatrınıñ önerpazı Säulejan Bağziya orındadı.

Keş soñın Erkin Şükimanov Aqan seriniñ «Qaratöbeti», Baluan Şolaqtıñ «Ğaliyasın» orınday kelip, ağabuın önerpazdardıñ özine amanat etken änderimen aqırlastırdı. Bwl änderdiñ qatarındağı Qajtay İliyastıñ «Sarı dalası» men Wlıqbek Esdäuletovtıñ sözine jazılğan änşi Twrsınğazınıñ «Aqtangeri» jwrt jüreginen orın aldı. Änşi öz şığarmaşılıq koncertiniñ şımıldığın «Aqtanger» änimen jauıp, önerdegi tälimin körgen ağalarınıñ amanatın orındağanın bildirdi.

Keş iesi jäne Alatau teatrınıñ önerpazdarı.

Keş soñında Erkin Şükimanovqa, Uaqıt tañdauı agenttigi men respublikalıq, qoğamdıq-sayasi «Prezident jäne halıq» gazetiniñ birlesken jobası boyınşa «2016 jıldıñ üzdik änşisi» nominaciyası tabıs etildi. Keş iesi dästürli öner teatrınıñ aşıluına qoldau körsetken ükimet orındarına rahmetin ayttı, keşke kelgen tıñdarmandarına da alğısın bildirdi. Keş körermenderi änşige zor qwrmet körsetip, sahna şımıldığı jabılğanşa qoşametin ayamadı.

Erkin Şükimanovqa "2016 jıldıñ eñ üzdik änşisi" nominaciyası tabıs etildi.

28-şi Qısqı Universiyadağa oray, Qazaq dästürli öner järmenkesi ayasındağı, dästürli änşi Erkin Şükimanovtıñ şığarmaşılıq keşi, käsibi biik deñgeydi ötip, almatılıqtardı qazaqtıñ körkem änderimen susındattı.

Estay BOJAN

"The Qazaq Times"