الماتىدا "جىلدىڭ ەڭ ۇزدىك ءانشىسىنىڭ" شىعارماشىلىق كەشى ءوتتى

5 اقپان كەشتە، الماتىداعى الاتاۋ ءداستۇرلى ونەر تەاترىندا، قازاق ءداستۇرلى ءان ونەرىنىڭ شوقتىعى بيىك ءانشىسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى ەركىن شۇكىمانوۆتىڭ «القوڭىر» اتتى شىعارماشىلىق كەشى بولىپ ءوتتى. The Qazaq Times حابارلايدى.

ەركىن شۇكىمانوۆتىڭ شىعارماشىلىق كەشى. فوتو: The Qazaq Times

كەشكە ءانشى ەركىن شۇكىمانوۆتىڭ ءتول شاكىرتتەرىمەن قاتار، الاتاۋ ءداستۇرلى ونەر تەاترىنىڭ ءانشى ونەرپازدارى قاتىستى. شىعارماشىلىق كەشىنىڭ شىمىلدىعىن ساكەن سەيفۋلليىننىڭ «تاۋ ىشىندە» انىمەن اشتى. ارى قاراي «شاشۋبايدىڭ ءانى»، مۇستافا بۇركىتبايۇلىنىڭ «بۇركىتباي»، حالىق انىنە اينالعان سەگىز سەرىنىڭ «گاۋھارتاسىن»، حالىققا «ماريام جاگورقىزىنىڭ ءانى» نەمەسە «دۋدارايدىڭ ءانى» اتانىپ كەتكەن، تولەبايدىڭ ءانى «دۋدارايدى» ورىنداپ، كەزەگىن شاكىرتتەرىنە بەردى.

ءانشىنىڭ شاركىرتتەرى ءان ورىنداۋ ونەرىنىڭ ءار قىرىنان شەبەرلىكتەرىن كورسەتتى. ازات دۋلاتۇلى بۇرىن ەش جەردە ورىندالماعان حالىق ءانى «قاراكوز» تارتۋ ەتسە، قازتاي اقىمەت قوبىزبەن ءان ايتۋ ءداستۇرىن جاڭعىرتىپ، حالىق ءانى «گۇلدەر-ايىمدى» ورىندادى. ءان اراسىندا سىبىزعى مۇراسىن ناسيحاتتاۋشى، ونەرتانۋ عىلىمدارىنىڭ كانديداتى، سىبىزعىشى تالعات مۇقىس كەش بوياۋىن اسىردى.

ساحناعا قايتا ورالعان كەش يەسى – ەركىن شۇكىمانوۆ كەشتىڭ «القوڭىر» اتىنا وراي، قازاقتىڭ ءبىر قاتار قوڭىر اندەرىمەن تىڭداۋشىسىن ءتانتى ەتتى. حالىق ءانى «القوڭىر»، اقان سەرىنىڭ «مايداقوڭىرى»، ەستايدىڭ «جايقوڭىرى» مەن كوپ جىل ساحىنا كورمەگەن «كىشى قوڭىر» اندەرىن ورىندادى. حالىق ءانى «ناز قوڭىردان» كەيىن ءانشى كەش كەزەگىن تاعىدا ءوز شاكىرتتەرىنە بەردى.

ناريمان قاجىمۇراتۇلى «ءيمانجۇسىپتىڭ ءانىن» ورىنداسا، حالىق ءانى «ەكى جيرەننىڭ» جۇرت كوپ تىڭداي بەرمەيتىن نۇسقاسىن ەركىن شۇكىمانوۆتىڭ تاڭداۋلى شاكىرتىنىڭ ءبىر، الاتاۋ تەاترىنىڭ ونەرپازى ساۋلەجان باعزيا ورىندادى.

كەش سوڭىن ەركىن شۇكىمانوۆ اقان سەرىنىڭ «قاراتوبەتى»، بالۋان شولاقتىڭ «عالياسىن» ورىنداي كەلىپ، اعابۋىن ونەرپازداردىڭ وزىنە امانات ەتكەن اندەرىمەن اقىرلاستىردى. بۇل اندەردىڭ قاتارىنداعى قاجتاي ءىلياستىڭ «سارى دالاسى» مەن ۇلىقبەك ەسداۋلەتوۆتىڭ سوزىنە جازىلعان ءانشى تۇرسىنعازىنىڭ «اقتانگەرى» جۇرت جۇرەگىنەن ورىن الدى. ءانشى ءوز شىعارماشىلىق كونتسەرتىنىڭ شىمىلدىعىن «اقتانگەر» انىمەن جاۋىپ، ونەردەگى ءتالىمىن كورگەن اعالارىنىڭ اماناتىن ورىنداعانىن ءبىلدىردى.

كەش يەسى جانە الاتاۋ تەاترىنىڭ ونەرپازدارى.

كەش سوڭىندا ەركىن شۇكىمانوۆقا، ۋاقىت تاڭداۋى اگەنتتىگى مەن رەسپۋبليكالىق، قوعامدىق-ساياسي «پرەزيدەنت جانە حالىق» گازەتىنىڭ بىرلەسكەن جوباسى بويىنشا «2016 جىلدىڭ ۇزدىك ءانشىسى» نوميناتسياسى تابىس ەتىلدى. كەش يەسى ءداستۇرلى ونەر تەاترىنىڭ اشىلۋىنا قولداۋ كورسەتكەن ۇكىمەت ورىندارىنا راحمەتىن ايتتى، كەشكە كەلگەن تىڭدارماندارىنا دا العىسىن ءبىلدىردى. كەش كورەرمەندەرى انشىگە زور قۇرمەت كورسەتىپ، ساحنا شىمىلدىعى جابىلعانشا قوشامەتىن ايامادى.

ەركىن شۇكىمانوۆقا "2016 جىلدىڭ ەڭ ۇزدىك ءانشىسى" نوميناتسياسى تابىس ەتىلدى.

28-ءشى قىسقى ۋنيۆەرسياداعا وراي، قازاق ءداستۇرلى ونەر جارمەنكەسى اياسىنداعى، ءداستۇرلى ءانشى ەركىن شۇكىمانوۆتىڭ شىعارماشىلىق كەشى، كاسىبي بيىك دەڭگەيدى ءوتىپ، الماتىلىقتاردى قازاقتىڭ كوركەم اندەرىمەن سۋسىنداتتى.

ەستاي بوجان

"The Qazaq Times"