Foto: pavlodarnews.kz

Qazaqstan prezidenti Nwrswltan Nazarbaev Qıtay memlekettik keñes prem'eri Li Keşanmen kezdesti. Eki jaq qos el arasındağı sauda-ekonomikalıq mäselelerdi talqığa saldı. Bwl turalı "Tengrinews" portalı habarladı.

Beyjiñde ötip jatqan jiında Nwrswltan Nazarbaev Qıtay eli Qazaqstannıñ iri seriktesi atanğanın jariya qıldı.

"Qos el arasındağı äriptestik qarım-qatınas jaña deñgeyge köterildi. Qıtay Qazaqstannıñ eñ iri seriktesteriniñ birine aynaldı. Memleketaralıq sauda-sattıq kölemi jıl sayın wlğayıp, ekonomikanıñ damuına serpin berdi. Sizder wsınğan industralizaciyalau jobası osı küni qarqın alıp, birneşe jobanı sätti jüzege asırıp jatırmız. Bas-ayağı 51 birlesken jobağa qol qoyğan edik. Onıñ jalpı qwnı 28 mlrd dollardı qwrağan. Osınıñ arqasında energetika, transport jäne auıl şaruaşılığı salalarında oñ özgeris bayqaladı" - dedi, Nwrswltan Nazarbaev.

Memleket basşısı öz sözinde eki elge ortaq mwnay qwbırı barın ayttı. Odan bölek, "Ortalıq Aziya-Qazaqstan" kögildir otın jelisi jwmıs istep twr. Birneşe jıldıñ işinde atalğan qwbırlar arqılı Qıtayğa ülken kölemde mwnay men gaz tasımaldanğan. Qıtaylıq taraptıñ swranısı boyınşa, aldağı jılı körşi memleketke beriletin mwnay kölemi anağwrlım arta tüspek. Taraptar tiisti qwjattarğa jaqında qol qoyuı da mümkin.

Keşe Qazaqstan prezidenti Nwrswltan Nazarbaev Qıtay eline resmi issaparmen barğan. Memleket basşısı Qıtay törağası Şi Jiñpiñmen jolığıp, Şindau qalasında ötetin Şanhay ıntımaqtastıq wyımınıñ sammitine qatıspaq.

Äzirge, Nwrswltan Nazarbaev osı saparında Qıtayda qısım körip jatqan etnikalıq qazaqtardıñ mäselesin kötere me, joq pa äzirge belgisiz.

“The Qazaq Times”