فوتو: pavlodarnews.kz

قازاقستان پرەزيدەنتى نۇرسۇلتان نازارباەۆ قىتاي مەملەكەتتىك كەڭەس پرەمەرى لي كەشانمەن كەزدەستى. ەكى جاق قوس ەل اراسىنداعى ساۋدا-ەكونوميكالىق ماسەلەلەردى تالقىعا سالدى. بۇل تۋرالى "Tengrinews" پورتالى حابارلادى.

بەيجىڭدە ءوتىپ جاتقان جيىندا نۇرسۇلتان نازارباەۆ قىتاي ەلى قازاقستاننىڭ ءىرى سەرىكتەسى اتانعانىن جاريا قىلدى.

"قوس ەل اراسىنداعى ارىپتەستىك قارىم-قاتىناس جاڭا دەڭگەيگە كوتەرىلدى. قىتاي قازاقستاننىڭ ەڭ ءىرى سەرىكتەستەرىنىڭ بىرىنە اينالدى. مەملەكەتارالىق ساۋدا-ساتتىق كولەمى جىل سايىن ۇلعايىپ، ەكونوميكانىڭ دامۋىنا سەرپىن بەردى. سىزدەر ۇسىنعان يندۋستراليزاتسيالاۋ جوباسى وسى كۇنى قارقىن الىپ، بىرنەشە جوبانى ءساتتى جۇزەگە اسىرىپ جاتىرمىز. باس-اياعى 51 بىرلەسكەن جوباعا قول قويعان ەدىك. ونىڭ جالپى قۇنى 28 ملرد دوللاردى قۇراعان. وسىنىڭ ارقاسىندا ەنەرگەتيكا، ترانسپورت جانە اۋىل شارۋاشىلىعى سالالارىندا وڭ وزگەرىس بايقالادى" - دەدى، نۇرسۇلتان نازارباەۆ.

مەملەكەت باسشىسى ءوز سوزىندە ەكى ەلگە ورتاق مۇناي قۇبىرى بارىن ايتتى. ودان بولەك، "ورتالىق ازيا-قازاقستان" كوگىلدىر وتىن جەلىسى جۇمىس ىستەپ تۇر. بىرنەشە جىلدىڭ ىشىندە اتالعان قۇبىرلار ارقىلى قىتايعا ۇلكەن كولەمدە مۇناي مەن گاز تاسىمالدانعان. قىتايلىق تاراپتىڭ سۇرانىسى بويىنشا، الداعى جىلى كورشى مەملەكەتكە بەرىلەتىن مۇناي كولەمى اناعۇرلىم ارتا تۇسپەك. تاراپتار ءتيىستى قۇجاتتارعا جاقىندا قول قويۋى دا مۇمكىن.

كەشە قازاقستان پرەزيدەنتى نۇرسۇلتان نازارباەۆ قىتاي ەلىنە رەسمي ىسساپارمەن بارعان. مەملەكەت باسشىسى قىتاي توراعاسى شي جيڭپيڭمەن جولىعىپ، شينداۋ قالاسىندا وتەتىن شانحاي ىنتىماقتاستىق ۇيىمىنىڭ سامميتىنە قاتىسپاق.

ازىرگە، نۇرسۇلتان نازارباەۆ وسى ساپارىندا قىتايدا قىسىم كورىپ جاتقان ەتنيكالىق قازاقتاردىڭ ماسەلەسىن كوتەرە مە، جوق پا ازىرگە بەلگىسىز.

“The Qazaq Times”