Soñğı uaqıttarı BAQ betterinde «Özbekstan Reseymen birlesip atom elektr stanciyasın saluı mümkin» - degen aqparattar tarauda. Osığan baylanıstı bügin biz oñtüstiktegi körşimizdiñ energetika salasına qısqaşa toqtaludı jön kördik.

Soñğı statistikalıq mälimetter boyınşa, qazirgi tañda Özbekstan halqı 100 payız elektr energiyasımen qamtamasız etilgen. Eldegi elektr quatınıñ  86 payızı jılu elektr stanciyalarınan, al 14 payızı su elektr stanciyalarınan alınadı. Jılu elektr stancilarınıñ 94 payızı gaz,  5 payızı kömir paydalanadı. Özbekstan tabiği gaz qorı boyınşa älemde segizinşi orında bolğanımen öndirilgen gazdıñ 80 payızı osı jılu elektr stanciyalarına jwmsaladı. Al qalğan 20 payızı özge elderge eksporttaladı. Biraq bwl el ekonomikasına aytarlıqtay payda alıp kelmeydi. Sebebi eldegi äleumettik-ekonomikalıq jağdaydıñ tömendigi, işki narıqtağı gaz ben elektr energiya bağasın qımbattatuğa mümkindik bermeydi. Bir sözben aytqanda resmi Taşkent atom elektr stanciyasın salu arqılı gaz eksportın arttırıp, payda tappaq.

Bwdan bölek Özbekstan atom elektr stanciyasın salu arqılı bolaşaqta boluı mümkin elektr energiyası tapşılığınan qwtılmaq. Bwlay deytin sebebimiz qazirgi tañda Özbekstan elektr stanciyaları sağatına 60,7 mlrd kVt energiya öndiredi. Bwl däl qazirgi jağdayda 30 millionnan astam halqı bar el üşin jetkilikti körsetkiş. Biraq şeteldik sarapşılardıñ pikirinşe, 2020 jılğa qaray Özbekstan halqı sağatına 71,8 mlrd kVt elektr energiyasın paydalanatın boladı. Bwl degenimiz Özbekstan 2020 jılğa qaray elektr energiyasınan tarşılıq köredi degen söz. Al Özbekstannıñ qazirdiñ özinde «bir de tatu, bir de araz» qırğız ağayındarınan elektr energiyasın importtaytının eskersek, onda jaqın bolaşaqta resmi Taşkenttiñ energetika qauipsizdigi bügingidey jaymaşuaq jağdayda bolmaytını anıq.

Jalpı, qazirgi uaqıtta Özbekstan uranı älemdegi uran qorınıñ 4 payızın qwraydı. El aumağında 20-dan astam ken ornı bar. 2017 jıldıñ 29 jeltoqsanında Özbekstan biligi atalmış ken orındarın igeruge baylanıstı Reseydiñ «Rosatom» kompaniyasımen kelisimge kelgen. Özbekstan BAQ ökilderine sensek, reseylikterden bölek Özbekstan uranın igeruge Qıtay men Japoniya kompaniyalarıda niet bildirgen. Osı twsta uran öndirisi men atom elektr stanciyasın saluda Qazaqstannıñ da «qara jayau» emes ekendigin ayta ketken jön. Osıdan biraz uaqıt bwrın Qazaqstan da Reseymen atom elektr stanciyasın saluğa baylanıstı kelissözder jürgizgen. BAQ betterinde «atom elektr stanciyaları Balqaş pen Kurçatov qalalarında salınadı» degen aqparatta şıqqan. Biraq  keyinnen bwl aqparattı «Qazatomprom» kompaniyasınıñ 25 payız akciyasın Qıtay satıp almaq» degen aqparat basıp ketken.

“The Qazaq Times”