سوڭعى ۋاقىتتارى باق بەتتەرىندە «وزبەكستان رەسەيمەن بىرلەسىپ اتوم ەلەكتر ستانتسياسىن سالۋى مۇمكىن» - دەگەن اقپاراتتار تاراۋدا. وسىعان بايلانىستى بۇگىن ءبىز وڭتۇستىكتەگى كورشىمىزدىڭ ەنەرگەتيكا سالاسىنا قىسقاشا توقتالۋدى ءجون كوردىك.

سوڭعى ستاتيستيكالىق مالىمەتتەر بويىنشا، قازىرگى تاڭدا وزبەكستان حالقى 100 پايىز ەلەكتر ەنەرگياسىمەن قامتاماسىز ەتىلگەن. ەلدەگى ەلەكتر قۋاتىنىڭ  86 پايىزى جىلۋ ەلەكتر ستانتسيالارىنان، ال 14 پايىزى سۋ ەلەكتر ستانتسيالارىنان الىنادى. جىلۋ ەلەكتر ستانتسيلارىنىڭ 94 پايىزى گاز،  5 پايىزى كومىر پايدالانادى. وزبەكستان تابيعي گاز قورى بويىنشا الەمدە سەگىزىنشى ورىندا بولعانىمەن وندىرىلگەن گازدىڭ 80 پايىزى وسى جىلۋ ەلەكتر ستانتسيالارىنا جۇمسالادى. ال قالعان 20 پايىزى وزگە ەلدەرگە ەكسپورتتالادى. بىراق بۇل ەل ەكونوميكاسىنا ايتارلىقتاي پايدا الىپ كەلمەيدى. سەبەبى ەلدەگى الەۋمەتتىك-ەكونوميكالىق جاعدايدىڭ تومەندىگى، ىشكى نارىقتاعى گاز بەن ەلەكتر ەنەرگيا باعاسىن قىمباتتاتۋعا مۇمكىندىك بەرمەيدى. ءبىر سوزبەن ايتقاندا رەسمي تاشكەنت اتوم ەلەكتر ستانتسياسىن سالۋ ارقىلى گاز ەكسپورتىن ارتتىرىپ، پايدا تاپپاق.

بۇدان بولەك وزبەكستان اتوم ەلەكتر ستانتسياسىن سالۋ ارقىلى بولاشاقتا بولۋى مۇمكىن ەلەكتر ەنەرگياسى تاپشىلىعىنان قۇتىلماق. بۇلاي دەيتىن سەبەبىمىز قازىرگى تاڭدا وزبەكستان ەلەكتر ستانتسيالارى ساعاتىنا 60,7 ملرد كۆت ەنەرگيا وندىرەدى. بۇل ءدال قازىرگى جاعدايدا 30 ميلليوننان استام حالقى بار ەل ءۇشىن جەتكىلىكتى كورسەتكىش. بىراق شەتەلدىك ساراپشىلاردىڭ پىكىرىنشە، 2020 جىلعا قاراي وزبەكستان حالقى ساعاتىنا 71,8 ملرد كۆت ەلەكتر ەنەرگياسىن پايدالاناتىن بولادى. بۇل دەگەنىمىز وزبەكستان 2020 جىلعا قاراي ەلەكتر ەنەرگياسىنان تارشىلىق كورەدى دەگەن ءسوز. ال وزبەكستاننىڭ قازىردىڭ وزىندە «ءبىر دە تاتۋ، ءبىر دە اراز» قىرعىز اعايىندارىنان ەلەكتر ەنەرگياسىن يمپورتتايتىنىن ەسكەرسەك، وندا جاقىن بولاشاقتا رەسمي تاشكەنتتىڭ ەنەرگەتيكا قاۋىپسىزدىگى بۇگىنگىدەي جايماشۋاق جاعدايدا بولمايتىنى انىق.

جالپى، قازىرگى ۋاقىتتا وزبەكستان ۋرانى الەمدەگى ۋران قورىنىڭ 4 پايىزىن قۇرايدى. ەل اۋماعىندا 20-دان استام كەن ورنى بار. 2017 جىلدىڭ 29 جەلتوقسانىندا وزبەكستان بيلىگى اتالمىش كەن ورىندارىن يگەرۋگە بايلانىستى رەسەيدىڭ «روساتوم» كومپانياسىمەن كەلىسىمگە كەلگەن. وزبەكستان باق وكىلدەرىنە سەنسەك، رەسەيلىكتەردەن بولەك وزبەكستان ۋرانىن يگەرۋگە قىتاي مەن جاپونيا كومپانيالارىدا نيەت بىلدىرگەن. وسى تۇستا ۋران ءوندىرىسى مەن اتوم ەلەكتر ستانتسياسىن سالۋدا قازاقستاننىڭ دا «قارا جاياۋ» ەمەس ەكەندىگىن ايتا كەتكەن ءجون. وسىدان ءبىراز ۋاقىت بۇرىن قازاقستان دا رەسەيمەن اتوم ەلەكتر ستانتسياسىن سالۋعا بايلانىستى كەلىسسوزدەر جۇرگىزگەن. باق بەتتەرىندە «اتوم ەلەكتر ستانتسيالارى بالقاش پەن كۋرچاتوۆ قالالارىندا سالىنادى» دەگەن اقپاراتتا شىققان. بىراق  كەيىننەن بۇل اقپاراتتى «قازاتومپروم» كومپانياسىنىڭ 25 پايىز اكتسياسىن قىتاي ساتىپ الماق» دەگەن اقپارات باسىپ كەتكەن.

“The Qazaq Times”