Foto: liter.kz

Nwrswltan Nazarbaev mausım ayında resmi issaparmen Qıtayğa baradı.

Mamır ayınıñ 28-i küni Qıtay sırtqı ister ministri Van I alda kele jatqan ŞIW-nıñ sammitine oray arnayı baspasöz mäslihatın ötkizgen. Onda ol: «Mausım ayınıñ 6-ı men 10-ı künderi aralığında Çindao qalasında ötetin Şanhay ıntımaqtastıq wyımınıñ kezekti sammitine Qazaqstan, Qırğızstan, Resey jäne Iran prezidentteri qatısadı. Wyımğa müşe elderdiñ memleket basşıları birlesken onğa juıq qwjatqa qol qoyadı» - dep mälimdegen.

Esteriñizge salayıq, aqpan ayında Qıtaydağı qazaqtardıñ qısım körip jatqandığı rastalğannan keyin, Qazaqstan sırtqı ister ministrligi Qıtayğa resmi nota tapsırğan. Keyinnen SİM Qayrat Äbdirahmanov atalmış mäselege baylanıstı jurnalister aldında söylegen sözinde: «Bwl isti biz baqılauımızda wstap otırımız. Qıtayda wstalğan azamattardıñ tuıstarı bizge qajetti mälimetterdi bergen. Biz osı mälimetter rastalğannan keyin Qıtay tarabına resmi türde diplomatiyalıq nota jiberdik. Qıtay jağınıñ naqtı jauabın alğannan keyin Qazaqstan azamattarına mäseleniñ män-jayın jetkizetin bolamız. Biz Qıtayda wstalğan Qazaqstan azamattarınıñ tuıstarımen tığız baylanıstamız, atı-jönderi de bizge belgili» – degen.

Nwrswltan Nazarbaevtıñ mausım ayındağı issaparında Qıtaydağı qazaqtardıñ mäselesi aytıla ma, joq pa belgisiz. Biraq bir belgilisi osı issapardıñ aldında sırtqı ister ministri Qayrat Äbdirahmanov Qıtayğa barıp, qıtaylıq äriptesi Van Imen kezdesip, memleket basşısınıñ aldağı issaparına qatıstı kelissözder jürgizgen jäne eki el azamattarınıñ qauipsizdigi men adam qwqığı jöninde pikir almasqan.

“The Qazaq Times”