فوتو: liter.kz

نۇرسۇلتان نازارباەۆ ماۋسىم ايىندا رەسمي ىسساپارمەن قىتايعا بارادى.

مامىر ايىنىڭ 28-ءى كۇنى قىتاي سىرتقى ىستەر ءمينيسترى ۆان ي الدا كەلە جاتقان شىۇ-نىڭ سامميتىنە وراي ارنايى ءباسپاسوز ءماسليحاتىن وتكىزگەن. وندا ول: «ماۋسىم ايىنىڭ 6-ى مەن 10-ى كۇندەرى ارالىعىندا چينداو قالاسىندا وتەتىن شانحاي ىنتىماقتاستىق ۇيىمىنىڭ كەزەكتى سامميتىنە قازاقستان، قىرعىزستان، رەسەي جانە يران پرەزيدەنتتەرى قاتىسادى. ۇيىمعا مۇشە ەلدەردىڭ مەملەكەت باسشىلارى بىرلەسكەن ونعا جۋىق قۇجاتقا قول قويادى» - دەپ مالىمدەگەن.

ەستەرىڭىزگە سالايىق، اقپان ايىندا قىتايداعى قازاقتاردىڭ قىسىم كورىپ جاتقاندىعى راستالعاننان كەيىن، قازاقستان سىرتقى ىستەر مينيسترلىگى قىتايعا رەسمي نوتا تاپسىرعان. كەيىننەن ءسىم قايرات ءابدىراحمانوۆ اتالمىش ماسەلەگە بايلانىستى جۋرناليستەر الدىندا سويلەگەن سوزىندە: «بۇل ءىستى ءبىز باقىلاۋىمىزدا ۇستاپ وتىرىمىز. قىتايدا ۇستالعان ازاماتتاردىڭ تۋىستارى بىزگە قاجەتتى مالىمەتتەردى بەرگەن. ءبىز وسى مالىمەتتەر راستالعاننان كەيىن قىتاي تارابىنا رەسمي تۇردە ديپلوماتيالىق نوتا جىبەردىك. قىتاي جاعىنىڭ ناقتى جاۋابىن العاننان كەيىن قازاقستان ازاماتتارىنا ماسەلەنىڭ ءمان-جايىن جەتكىزەتىن بولامىز. ءبىز قىتايدا ۇستالعان قازاقستان ازاماتتارىنىڭ تۋىستارىمەن تىعىز بايلانىستامىز، اتى-جوندەرى دە بىزگە بەلگىلى» – دەگەن.

نۇرسۇلتان نازارباەۆتىڭ ماۋسىم ايىنداعى ءىسساپارىندا قىتايداعى قازاقتاردىڭ ماسەلەسى ايتىلا ما، جوق پا بەلگىسىز. بىراق ءبىر بەلگىلىسى وسى ءىسساپاردىڭ الدىندا سىرتقى ىستەر ءمينيسترى قايرات ءابدىراحمانوۆ قىتايعا بارىپ، قىتايلىق ارىپتەسى ۆان يمەن كەزدەسىپ، مەملەكەت باسشىسىنىڭ الداعى ءىسساپارىنا قاتىستى كەلىسسوزدەر جۇرگىزگەن جانە ەكى ەل ازاماتتارىنىڭ قاۋىپسىزدىگى مەن ادام قۇقىعى جونىندە پىكىر الماسقان.

“The Qazaq Times”