Körermen qauım dän riza.

Bügin, 31 qañtar küni keşte, Almatıdağı Alatau dästürli öner teatrında «Ağajay, Altayday jer qayda...» attı Altay-Tarbağatay öñiriniñ dästürli muzıkalıq keşi ötti dep habarlaydı The Qazaq Times. 

Alatau dästürli öner teatrında qazaq öneri men mädenietiniñ körgizbesi ötip jatır. Bügingi Altay-Tarbağatay öñiriniñ muzıkalıq keşi de sonıñ bir parası. Şaranıñ jalpı barısı men maqsatı turalı teatrdıñ körkemdik jetekşisi Bazarbek Atığaydı sözge tartqan edik:

– Şara Dästürli öner teatrmızda, 28-şi Bükilälemdik Universiadağa oray, Almatı qalalıq Mädeniet basqarmasınıñ arnayı tapsırmasımen ötude. Şara uaqıtı 30 qañtar men 8 aqpan arasında boladı. Keşe Arqa än-küyleriniñ keşi ötti, bügin mine  Altay-Tarbağatay öñiriniñ muzıkalıq keşimen jalğasuda. Alda Jetisu, Sır, Batıs dästürli muzkalıq mektepteriniñ keşteri bar. Säule Janpeysova, Erkin Şükiman qatarlı dästürli änşilerdiñ jekelegen şığarmaşılıq keşteri, Batırjan Mıqtıbaevtıñ küy keşine jalğasadı. Student jas aqındar aytısı da bolmaq.

Sonımen qatar, «Alatau alabında» attı etno-festival' ötude, dästürli muzıka önerimiz ğana emes, qazaqtıñ qolöner, tağam mädenieti,  qısqaşa aytqanda etnografiyalıq ömirin tanıstırudı maqsat etken keşendi şaranı qolğa alıp jatırmız.  

Osınıñ bäri Universiada qarsañında qala qonaqtarı men qala twrğındarına arnalıp otır. Bwğan qalalıq Mädeniet basqarması qoldau körsetkenin ayta ketken jön. Şara bastalğalı şeteldik qonaqtardıñ ayağı üzilgen joq. Qazaq mädenietimen tanısıp, wlttıq tağamdardan auız tiip, razı bolsıp jatır.

"Alatau alabında"

Bügingi keşte önerpazdar Altay-Tarbağatay öñiriniñ bay mazmwndağı öner tuındıların tartu etti. El esinen wmıt bola bastağan birneşe öner tuındısı halıqqa qayta körsetildi. Keşte Erkin Şükimanov, Erlan Rısqali, Bağlan Bäbijan, Säulejan Dağziya, Älibi Begaydar, Talğat Äbuğazı, Marat Tölepbergen qatarlı tanımal dästürli änşiler men Nariman Qajımwratwlı, Jaswlan Mwsağali, Gülmira Asılbek,  Qaztay Ahmet, Dilmwrat Quantaywlı sındı jas änşiler än saldı. Şığıs än mektebiniñ «Jorğatay», «Kerim-ay», «Kerbez kerim», «Gülderayım» sındı halıq änderin, «Swlubay», «Oy, Ğayşa», «Qos jeñge», «Qayran Altay-Marqaköl» qatarlı halıq kompozitorlarınıñ änderin, «Jigitter än salıñdar» sındı wmıt bola bastağan änderdi orındap, keş qonaqtarın qoñır äuenmen terbedi.

Arğımaqtay arındap öleñ aytsam...

Sıbızğışı Talğat Mwqış, küyşi Mwqaş Tañğwtwlı, Sırım Nwrbol, Nwrdanqoja Swltanqojawlı qatarlı küyşiler avtorlıq jäne şığıstıq halıq küylerin orındadı. Keştiñ özindik boyauı retinde Şığıs än mektebiniñ erekşeligine jatatın qobız jäne üş işekti dombıranıñ süyemelindegi än aytu qazaq muzıka öneriniñ baylığın tolıq tanıtqanday. Zaldağı azğantay tehnikalıq aqaular da, keş tıñdarmandarınıñ Altay-Tarbağatay än-küyine degen qızu ıntasın basa almadı. Keş şımıldığın «Abat» tobı «Ağajay, Altayday jer qayda-ay» änimen japtı.

Dästürli önerdiñ düldülderi

“The Qazaq Times”