كورەرمەن قاۋىم ءدان ريزا.

بۇگىن، 31 قاڭتار كۇنى كەشتە، الماتىداعى الاتاۋ ءداستۇرلى ونەر تەاترىندا «اعاجاي، التايداي جەر قايدا...» اتتى التاي-تارباعاتاي ءوڭىرىءنىڭ ءداستۇرلى مۋزىكالىق كەشى ءوتتى دەپ حابارلايدى The Qazaq Times. 

الاتاۋ ءداستۇرلى ونەر تەاترىندا قازاق ونەرى مەن مادەنيەتىنىڭ كورگىزبەسى ءوتىپ جاتىر. بۇگىنگى التاي-تارباعاتاي ءوڭىرىنىڭ مۋزىكالىق كەشى دە سونىڭ ءبىر پاراسى. شارانىڭ جالپى بارىسى مەن ماقساتى تۋرالى تەاتردىڭ كوركەمدىك جەتەكشىسى بازاربەك اتىعايدى سوزگە تارتقان ەدىك:

– شارا ءداستۇرلى ونەر تەاترمىزدا، 28-ءشى بۇكىلالەمدىك ۋنيۆەرسياداعا وراي، الماتى قالالىق مادەنيەت باسقارماسىنىڭ ارنايى تاپسىرماسىمەن وتۋدە. شارا ۋاقىتى 30 قاڭتار مەن 8 اقپان اراسىندا بولادى. كەشە ارقا ءان-كۇيلەرىنىڭ كەشى ءوتتى، بۇگىن مىنە  التاي-تارباعاتاي ءوڭىرىنىڭ مۋزىكالىق كەشىمەن جالعاسۋدا. الدا جەتىسۋ، سىر، باتىس ءداستۇرلى مۋزكالىق مەكتەپتەرىنىڭ كەشتەرى بار. ساۋلە جانپەيسوۆا، ەركىن شۇكىمان قاتارلى ءداستۇرلى انشىلەردىڭ جەكەلەگەن شىعارماشىلىق كەشتەرى، باتىرجان مىقتىباەۆتىڭ كۇي كەشىنە جالعاسادى. ستۋدەنت جاس اقىندار ايتىسى دا بولماق.

سونىمەن قاتار، «الاتاۋ الابىندا» اتتى ەتنو-فەستيۆال وتۋدە، ءداستۇرلى مۋزىكا ونەرىمىز عانا ەمەس، قازاقتىڭ قولونەر، تاعام مادەنيەتى،  قىسقاشا ايتقاندا ەتنوگرافيالىق ءومىرىن تانىستىرۋدى ماقسات ەتكەن كەشەندى شارانى قولعا الىپ جاتىرمىز.  

وسىنىڭ ءبارى ۋنيۆەرسيادا قارساڭىندا قالا قوناقتارى مەن قالا تۇرعىندارىنا ارنالىپ وتىر. بۇعان قالالىق مادەنيەت باسقارماسى قولداۋ كورسەتكەنىن ايتا كەتكەن ءجون. شارا باستالعالى شەتەلدىك قوناقتاردىڭ اياعى ۇزىلگەن جوق. قازاق مادەنيەتىمەن تانىسىپ، ۇلتتىق تاعامداردان اۋىز ءتيىپ، رازى بولسىپ جاتىر.

"الاتاۋ الابىندا"

بۇگىنگى كەشتە ونەرپازدار التاي-تارباعاتاي ءوڭىرىنىڭ باي مازمۇنداعى ونەر تۋىندىلارىن تارتۋ ەتتى. ەل ەسىنەن ۇمىت بولا باستاعان بىرنەشە ونەر تۋىندىسى حالىققا قايتا كورسەتىلدى. كەشتە ەركىن شۇكىمانوۆ، ەرلان رىسقالي، باعلان ءبابىجان، ساۋلەجان داعزيا، ءالىبي بەگايدار، تالعات ابۋعازى، مارات تولەپبەرگەن قاتارلى تانىمال ءداستۇرلى انشىلەر مەن ناريمان قاجىمۇراتۇلى، جاسۇلان مۇساعالي، گۇلميرا اسىلبەك،  قازتاي احمەت، ءدىلمۇرات قۋانتايۇلى سىندى جاس انشىلەر ءان سالدى. شىعىس ءان مەكتەبىنىڭ «جورعاتاي»، «كەرىم-اي»، «كەربەز كەرىم»، «گۇلدەرايىم» سىندى حالىق اندەرىن، «سۇلۋباي»، «وي، عايشا»، «قوس جەڭگە»، «قايران التاي-مارقاكول» قاتارلى حالىق كومپوزيتورلارىنىڭ اندەرىن، «جىگىتتەر ءان سالىڭدار» سىندى ۇمىت بولا باستاعان اندەردى ورىنداپ، كەش قوناقتارىن قوڭىر اۋەنمەن تەربەدى.

ارعىماقتاي ارىنداپ ولەڭ ايتسام...

سىبىزعىشى تالعات مۇقىش، كۇيشى مۇقاش تاڭعۇتۇلى، سىرىم نۇربول، نۇردانقوجا سۇلتانقوجاۇلى قاتارلى كۇيشىلەر اۆتورلىق جانە شىعىستىق حالىق كۇيلەرىن ورىندادى. كەشتىڭ وزىندىك بوياۋى رەتىندە شىعىس ءان مەكتەبىنىڭ ەرەكشەلىگىنە جاتاتىن قوبىز جانە ءۇش ىشەكتى دومبىرانىڭ سۇيەمەلىندەگى ءان ايتۋ قازاق مۋزىكا ونەرىنىڭ بايلىعىن تولىق تانىتقانداي. زالداعى ازعانتاي تەحنيكالىق اقاۋلار دا، كەش تىڭدارماندارىنىڭ التاي-تارباعاتاي ءان-كۇيىنە دەگەن قىزۋ ىنتاسىن باسا المادى. كەش شىمىلدىعىن «ابات» توبى «اعاجاي، التايداي جەر قايدا-اي» انىمەن جاپتى.

ءداستۇرلى ونەردىڭ دۇلدۇلدەرى

“The Qazaq Times”