Grenfel ğimaratınıñ (Grenfell Tower) örtine jauaptı twlğalardıñ eşqanday jazağa tartılmağanına köñil audartu üşin qoğam belsendileri 3 bilbord jabıstırılğan kölikti London ortalığına jiberdi, - dep habarlaydı Euronews aqparat agenttigi. 

"Grenfel üşin ädilettik ornasın" ( Justice 4 Grenfell) attı wlıbritaniyalıq belsendiler tobı beysenbi, yağni örttiñ bolğanına 8 ay ötken soñ bilbordtar japsırılğan 3 furgondı ortalıq köşelerde aydap jürip, halıq nazarın özderine audartuğa tırıstı.

Jaqında halıqaralıq prokatqa şıqqan "Ebbing sırtındağı 3 bilbord, Missuri" (Three Billboards Outside Ebbing, Missouri) attı fil'mde bir äyel jergilikti policeylerge öz habarlamasın jetkizu üşin qalağa kiretin jerde bilbord şığarıp qoyadı. Däl osı fil'm Londonnıñ qoğam belsendilerin şabıttandırğan bolu kerek.

Bilbordtarda "71 adam mert boldı", "Biraq eşkim jauapqa tartılmadı", "Qalayşa?" degen jazular bar. Kölik osı jazuımen Parlament ğimaratınan bastap, qalanıñ negizgi jerlerin aralap qayttı.

Joğarıda atalğan belsendiler tobı 2017 jıldıñ mausımında Grenfel twrğın üyinde bolğan örtke baylanıstı tergeu jwmıstarı eşqanday nätijege alıp kelmegenin halıqqa jetkizu üşin osınday täsildi qoldandı.

Belsendiler özderiniñ veb-sayttarında: "Bwl qayğılı oqiğa 8 ay bwrın boldı. Biraq eşkimniñ qozğalatın oyı da joq. Twrğın üydegi ört 71 adamnıñ ömirin alıp ketti. Jauaptılar nege jazasın tartpaydı? Qalada örtenu qaupi bar däl osınday 297 ğimarat bar. Grenfel örtenip, üy-jaysız qalğandardıñ qazirgi jağdayı öte naşar", - dep jazğan.

“The Qazaq Times”