گرەنفەل عيماراتىنىڭ (Grenfell Tower) ورتىنە جاۋاپتى تۇلعالاردىڭ ەشقانداي جازاعا تارتىلماعانىنا كوڭىل اۋدارتۋ ءۇشىن قوعام بەلسەندىلەرى 3 بيلبورد جابىستىرىلعان كولىكتى لوندون ورتالىعىنا جىبەردى، - دەپ حابارلايدى Euronews اقپارات اگەنتتىگى. 

"گرەنفەل ءۇشىن ادىلەتتىك ورناسىن" ( Justice 4 Grenfell) اتتى ۇلىبريتانيالىق بەلسەندىلەر توبى بەيسەنبى، ياعني ءورتتىڭ بولعانىنا 8 اي وتكەن سوڭ بيلبوردتار جاپسىرىلعان 3 فۋرگوندى ورتالىق كوشەلەردە ايداپ ءجۇرىپ، حالىق نازارىن وزدەرىنە اۋدارتۋعا تىرىستى.

جاقىندا حالىقارالىق پروكاتقا شىققان "ەببينگ سىرتىنداعى 3 بيلبورد، ميسسۋري" (Three Billboards Outside Ebbing, Missouri) اتتى فيلمدە ءبىر ايەل جەرگىلىكتى پوليتسەيلەرگە ءوز حابارلاماسىن جەتكىزۋ ءۇشىن قالاعا كىرەتىن جەردە بيلبورد شىعارىپ قويادى. ءدال وسى فيلم لوندوننىڭ قوعام بەلسەندىلەرىن شابىتتاندىرعان بولۋ كەرەك.

بيلبوردتاردا "71 ادام مەرت بولدى", "بىراق ەشكىم جاۋاپقا تارتىلمادى", "قالايشا؟" دەگەن جازۋلار بار. كولىك وسى جازۋىمەن پارلامەنت عيماراتىنان باستاپ، قالانىڭ نەگىزگى جەرلەرىن ارالاپ قايتتى.

جوعارىدا اتالعان بەلسەندىلەر توبى 2017 جىلدىڭ ماۋسىمىندا گرەنفەل تۇرعىن ۇيىندە بولعان ورتكە بايلانىستى تەرگەۋ جۇمىستارى ەشقانداي ناتيجەگە الىپ كەلمەگەنىن حالىققا جەتكىزۋ ءۇشىن وسىنداي ءتاسىلدى قولداندى.

بەلسەندىلەر وزدەرىنىڭ ۆەب-سايتتارىندا: "بۇل قايعىلى وقيعا 8 اي بۇرىن بولدى. بىراق ەشكىمنىڭ قوزعالاتىن ويى دا جوق. تۇرعىن ۇيدەگى ءورت 71 ادامنىڭ ءومىرىن الىپ كەتتى. جاۋاپتىلار نەگە جازاسىن تارتپايدى؟ قالادا ورتەنۋ قاۋپى بار ءدال وسىنداي 297 عيمارات بار. گرەنفەل ورتەنىپ، ءۇي-جايسىز قالعانداردىڭ قازىرگى جاعدايى وتە ناشار", - دەپ جازعان.

“The Qazaq Times”