Foto: SQO baspasöz qızmeti

Soltüstik Qazaqstan oblıstıq bilim basqarmasınıñ keñeytilgen alqa otırısında aymaq basşısı  Qwmar Aqsaqalov agrarlı aymaqta auıl şaruaşılığı bağıtındağı fakul'tettiñ joq ekenin ayttı, dep habarlaydı oblıs äkimdiginiñ baspasöz qızmeti. 

«Agrarlıq aymaqta auıl şaruaşılığı salası mamandarın dayındaytın fakul'tet joq. Bizdiñ balalar Kökşetau, Qostanay jäne Astanağa barıp oqıp jür. Kerisinşe, bizde oqu kerek, basqa öñirlerden bizdiñ universitetke kelip bilim alu kerek qoy. Bwnda jer qwnarlı, tiisinşe, üzdik mamandar jäne ğalımdar, tehnologiyalar bizdiñ öñirden şığu kerek. Qazir universitet basşılığı aldında osınday mindet twr. Biz qazir auıl şaruaşılığı ministrligimen osı bağıtta jwmıs jasap jatırmız», - dedi Qwmar Aqsaqalov.

SQMU-de medicinalıq fakul'tet te qwrılıp jatır. Pedagogika salasında mamandardıñ tapşılığın joyu maqsatında oblıstıq byudjetten qarjı bölinip, 75 grant tağayındaldı.

Oblıs äkimi «Serpin» bağdarlaması boyınşa bilim alıp jatqan studentterge qoldau körsetip,  barlığın jwmıspen qamtudı tapsırdı. Qazir universitette 127 qız-jigit oquların tämamdauğa jaqın. Kolledjderde biıl 192 student tülek atanadı.

“The Qazaq Times”