Foto: rodinabg.com

Qazaqstandıqtar kömir izdep biılğıday sabılmağan bolar, şaması. Öytkeni ötken jıldıñ qazan ayında bastalğan kömir tapşılığı, osı jıldıñ qañtarında qayta bastaldı. Qaqağan ayazda osınşa daurığatınday ne kün tudı? Bağağa kelsek alıpsatarlardıñ asığı alşısınan tüsip twr. Bürseñdegen halıq tonnalap satsañ da, möşekke qaptap satsañ da aluğa dayın. Biraq olay satıp aluğa da mümkindigi şekteuli! Kömir joq!

Osıdan üş ay bwrın, yağni ötken jıldıñ qazan ayında da benzin men kömir tapşılığı qatar bastalğan şaqta QR energetika ministri Qanat Bozımbaev elde "kömir tapşılığı joq" ekenin aytqan bolatın.

«Bügingi küni elde kömir tapşılığı joq. Qırküyektiñ ortasında künniñ kürt suuına baylanıstı ortalıq jäne soltüstik oblıstarda kömirge swranıs arta tüsti», - degen edi ol qazan ayınıñ 17-sinde bolğan Ükimet otırısı kezinde.

Degenmen ol kezde kömirdiñ jetispeuşiligi barlıq derlik öñirde bayqalıp, bağa ösip ketken edi. Al bwğan qatıstı ministrlik tarapı "kömir bağasınıñ ösuine temir jol tarifteri jäne deldaldıq wyımdardıñ «qosuları» aytarlıqtay äser etedi" degen mälimet keltirgen.

Al osı jolı ministr "kömir tapşılığı joq" deuge negiz tappadı ma, äyteuir bar mäsele jergilikti äkimdiktermen baylanıstı ekenin aytıp qaldı.

"Jergilikti organdar qatañ baqılauda wstau kerek bwl mäseleni. Men tiisti äkimdermen özim ötken aptada, osı aptada  söyleskem. Qazir 16 mıñ tonna kömir  Almatığa jäne Almatı oblısına jöneltildi. Bügin-erteñ tupikterge kelip, satılatın boladı", - dedi ol keşe Ükimet otırısınan keyin jurnalisterge bergen jauabında.

Biraq ministrlik tapşılıqtıñ neden bolıp otırğanı turalı osı künge deyin tek jalpılama jauap qaytarıp keledi. Saldarı aytılğanmen, naqtı sebebi nede ekeni äli anıq emes.  Tek bir biletinimiz, kömir jetkizuge jauaptı kompaniyalar uaqıtında kelisim-şart jasamağan körinedi. Osılayşa, "kömir tapşılığı qoldan jasalğanın" aytıp aqtaluda.

Alayda "Şwbarköl Kömir" AQ bolsa "Qazaqstanda özderiniñ temir jol orındarı bolmağandıqtan jäne kömirdi bölşek saudada satumen aynalıspaytındıqtan, narıqtağı tapşılıqtıñ sebepterin anıqtau qiın" ekenin aytadı. Olardıñ sözinşe, käsiporın kömirmen qamtamasız etu jağdayın twraqtandıru üşin jergilikti atqaruşı organdarmen jwmıs istep jatır eken.

Bwdan bölek, Ekibastwz kömir basseyninen kömir jetkizetinderdiñ birine habarlasıp kördik. Özin Aleksandr dep tanıstırğan adam "qazir Almatığa kömir jetkizip jatırsızdar ma?" degen swrağımızğa "seyças net" dep qısqa jauap qayırdı. Basqa da kömir jektizumen aynalısatındardıñ da aytar jauabı osı. Sonda kömir qayda ketti? El işindegi kömirdi bir öñirden ekinşi öñirge jetkizu sonşalıqtı qiın bolğanı ma? Osınday swraqtardan keyin "kömir tapşılığı onıñ şetelge satıluınan tuındadı" degen aqparat ta taradı. Degenmen ministr mwnı da  joqqa şığardı.

Qısqası, äzirge Qazaqstan özinde bar önimdi paydalanudıñ jolın tappay jür jür me, tüsiniksiz. Mwnaylı el bola twra ne benzinge, ne kömirge  jarımay otırğan jayımız bar. Älde basşılarımız osınday tapşılıq jan alqımnan alıp, jel twrıp, şöp bası qimıldağanda ğana qolğa aludı ädetke aynaldırğan ba? Äyteuir jılda bayqaytınımız, tek osınday äleumettik-ekonomikalıq mäseleler tuğanda ğana jügiruge et üyrengen. Al onı aldın aludıñ alğışartı dayındala ma, joq pa ol jağı da bizge beymälim.

“The Qazaq Times”